06-11-06

今晚同online friend可可傾開計，佢慨嘆自己27歲都未結婚，好驚會冇人要，我同佢講「我都係27啦，未結婚唔係好出奇0者！最多到妳30歲未結婚我就娶妳啦！」點知小琳妹子突然間話：「唔係0窩，明媽幫你搵人算過命，話你30歲會結婚0窩！」

係？點解我一直都唔知有件咁0既事？「明媽叫我唔好同你講0既！」

小琳妹子仲話：「算命果個人一講你0既性格，我0地就覺得佢講中晒啦！」

我聽完之後打0左個突，再計一計，小弟今年都27到尾啦，仲有三個月就28，即係話我會晌大約三年內結婚。三年？儲老婆本都未夠啦，咁都結到婚0既，大慨只有一個可能……冇錯就係奉子成婚啦！

仲有另外一樣，以前玩占卜，「女」「朋」「友」三字，問姻緣，得出「六牛耕地，墾開無疆，成成結實，盈稟盈倉」。果時估我會第六次拍拖先結婚，所以都唔會咁早，但係而家睇0黎，我會晌呢三年內有多兩個女朋友？咁……呢三年都幾忙0窩……

唔記得問0既係，算命果個話我30結婚，有冇講幾多歲離婚呀？如果結完會離0既，我寧願唔結啦……

講返轉頭，我大可可都係4個月多d，到佢30，我都係30……唔係掛……