19-07-06

從我學打羽毛球開始，我就係用同一塊藍色0既羽毛球拍，大大話話都打0左十幾年，估唔到今日第一次同EHCCS同事打羽毛球，就係佢退役0既日子……

我同EHCCS同事間唔中都會有聯誼活動，今次係打羽毛球。其實上晝已經體力勞動完一輪，因為晌Kamen指導下，我同Peter仔一齊學用樓梯機─專門幫d行得唔好0既公公婆婆上落樓梯0既機器。第一次學機上面冇坐人，上落0左一轉就輪到Peter坐上去，佢個樣驚到好似我一定會跌佢落樓梯咁……咁唔得0架0窩Peter，你要對同事，即係我，有信心先得0架嘛。跟住輪到Peter載我，佢又係面有難色，最後都係改載Kamen……唔，我會考慮查0下法例有冇體重歧視……不過最後佢都係要載我一轉。

因為練習0既地方係冇冷氣0既，所以即使Kamen只係「睇你勞動」，都同我呢d體力勞動0既人一樣全身濕晒，但奇怪0既係，Peter竟然係冇汗出0既(因為佢0既制服白色恤衫，濕身應該會好覺)，Kamen唔知有冇好失望呢……？

雖然用樓梯機係好辛苦同好緊張，但係可以分擔0左Raymond同Kamen 0既工作，唔駛次次都係佢0地出動，都係一件好事0黎0既。

夜晚上0左去文仔做gym果間健身室─0既樓上打羽毛球，估唔到係一個室外地方，上到去未打已經覺得熱，打0左一輪仲好似游完上未抹身咁……難得Peter打完又係一滴汗都冇……佢d毛孔係唔係閉塞0左呀？

阿曉因為中心有0野要做，所以遲0左0黎，但係佢一0黎到，我0地全部人都「眼前一亮」：佢著住到打golf 0既衫上0黎！er……先生，打golf唔該隔離果棟樓0丫……結果晌「冇姿勢冇實際」0既情況下不斷咁輸……

我覺得Raymond係我0地咁多個入面最好體能0既一個，打0左好耐都冇咩點喘氣，而且仲要係好大力。我個拍本身已經係爛爛0地，佢仲要好似幫d阿婆扭骨咁搖我個拍(其實我都知個拍係搖到0既，不過我冇佢咁大力)，結果打俾佢打0左幾球，個拍就「噗」一聲咁變成相中0既樣……之後Raymond仲要馬上唔見0左人，半個鐘之後先返0黎……

打完波去0左食飯，因為真係好餓。等緊0野食0既時候Kamen話：「其實用完樓梯機係要做返d拉筋0既。」姑娘……我0地用完差唔多十個鐘妳先講？