03-07-06

「人會隨著不同的心情，作出不同的破壞。」我真係好鍾意《幽遊白書》入面呢句對白，亦都好認同。小則摑人一巴，大則興兵打仗，都係隨住心情而破壞。我冇打人0既本事，更冇打仗0既本事，我可以做0既，可能就係破壞自己。

晌上個月0既今日，我開始同小晴嗌交，加埋再早前Kitty同主任過身、工作上0既壓力，令我去到崩潰0既地步，我開始想破壞自己，跳樓啦、食藥啦、割脈啦、打空氣針啦，甚至搶警察0既槍我都諗過，仲要開始諗遺書點寫、諗d模型、書、CD同銀行0既錢點處理。我理智上知道自己唔可以咁諗，但係自毀0既念頭不斷晌心中擴大，果種感覺好恐怖：感到自己個心俾一團黑色0既0野圍住，越係叫自己唔好諗，念頭就越係湧上0黎……終於我知道自己承受唔住，就去0左搵姚Miss─一個我最信任0既人。晌佢面前我終於忍唔住喊0左出0黎，亦講0左好多心入面唔知點開口講0既說話。姚Miss馬上指出我係患上0左抑鬱症，佢第二日仲即刻幫我約0左醫生。

講真我真係冇諗過自己都會有抑鬱0既一日，我以為自己好多0野都可以handle得好好……原來，我比自己想像中脆弱。

醫生一路聽我講0野，一路寫低d notes，最後得出0既結論係：A.S.D.，Acute Stress Disorder。算係抑鬱0既一種，當一個人突發要面對好多因悲傷而形成0既壓力0既時候，就有可能會陷入A.S.D.狀態，處理唔到0既就會變成PTSD(創傷後遺症)。我明d唔明d，返0黎查書亦未查到，總之聽住醫生話，定時食藥同覆診(不過診金就甘0左d……Kamen講笑話：睇多幾次，冇事都變有事，因為見到荷包水位急跌)。

原本經過一個月，我都以為冇事0架啦，點知……我再次跌入果個黑色0既深淵，雖然冇一個月前咁強烈，但係對住幾個藥袋發呆，自己知自己事……

雖然好多同事都feel到我又出0左問題，但係結果我都係安全咁過0左呢一日，只係袋入面0既煙又少0左一堆……冇錯係一堆！我好少一日抽咁多煙，直至上車開始作嘔，我先知道，原來飲酒同抽煙0既動機都係破壞─破壞自己0既健康、破壞自己0既身體、破壞自己0既精神……