02-06-06

由上個月22號收到我大學時代0既班主任Kitty過身0既消息，到今日參加佢0既守靈禮，心情都仲係平伏唔到。雖然我好多同Kitty一齊0既記憶都已經開始模糊，但係我點都唔相信，亦拒絕去相信，Kitty會係一個放棄生命0既人。記憶中Kitty好鍾意笑、鍾意玩、咩都難唔到佢。我相信以後晌我心目中，佢0既形象都係永遠咁笑臉迎人。

Kitty係我第一個大學導師，亦係我0地班主任，佢教曉我0地好多0野，今次都唔例外。

收到佢過身0既消息0既第一刻，我係完全唔可以相信，另外有個念頭浮起：人生，原來可以咁就冇「下一次」。話說三年前Kitty + 一戊17人相約以後，就一直都約唔到齊人，每次約0既時候都會抱住「唔緊要，下一次再約啦」0既心態。但係到0左呢一刻，我發覺呢句話唔係講得咁容易，因為冇人會知道，究竟仲會唔會有「下一次」。

Kitty去世0既原因有兩個版本，有人話佢係suicide，亦有話佢係因病，我寧可相信後者，雖然可能係自欺欺人，但係學會相信「美麗的謊言」，總比知道「殘酷的真相」安心。我0地一向都教client做人要有希望，其實希望，都可能係「美麗的謊言」0既一種。

我0地一戊仔女，大家都活躍晌唔同0既崗位，平時好少聚埋一齊。今次雖然係因一件唔開心0既事而聚首，但係再見返大家，果種「戰友」0既感覺又出返0黎；唔止我0地一戊，就連其他Kitty教過0既同學，守靈禮都有出席，忽然驚覺，原來同門師兄弟係咁多。

今次，真係要再見啦……雖然妳已經不在，但係妳教過我0既0野，會永遠陪住我；我亦會將妳教0既傳揚出去，我相信咁樣，就係懷念妳0既最好方式。

Rest in peace，our respected one(by Kit)