23-03-06

成個三月，少明都係俾一d叫ICP(Individual Care Plan，個人照顧計劃)0既文件困擾住。顧名思義，ICP係要就住每個client 0既需要，度身制定一個照顧計劃，要針對client 0既需要set個目標，然後透過唔同0既工作手法達到目標。不過晌工作前，我已經俾d ICP文件玩死0左──我大約只係見過廿零個client，都唔知佢0地有咩需要，點寫care plan？仲要將個care plan用電腦記錄，所以之前日日都係對住電腦做data entry。deadline係27/3，少明0既速率係一日入二十個，仲要係晌七個小時都係對住電腦0既情形下。

主任有見及此，今日就請0左藍田安老院0既社工Kimmy過0黎幫我手入ICP。我問Kimmy：「妳都未見過佢0地，點做care plan呀？」「估囉！大概都係果d 0野0架啦！」我都明呢次做care plan係應付社署巡查，不過靠估好似唔係咁好……算啦，一來人0地只係0黎幫手，二來我自己未見過0既case，咪一樣係靠估……

但係人0既工作能力竟然可以相差咁遠，少明七個鐘入二十個ICP，Kimmy竟然係三個鐘入五十個！食完lunck一點鐘Kimmy再開工做double check，四點鐘已經話check晒total 85個case！跟住可以放工tim！少明送0左Kimmy出門口，一路覺得額角有滴叫「慚愧」0既冷汗流緊落0黎……

好戲在後頭。

前日少明同小琳爭電腦用，因為大家都要用電腦交文件，於是商量不如買部notebook；尋日小琳話已經買0左，但係我都唔為意點解唔見有人拎出0黎，今日終於知道點解：原來明媽同小琳去0左買部desktop！今日明媽仲要買埋電腦檯，要少明幫手搬返屋企，於是少明就晌一個好「瘀」0既情況下放0左工……老實講，今日發現自己工作效率原來咁低，要由人0地完成我0既工作，仲要四點三咁早走，想唔瘀死都難。

去到荃灣ikea，明媽已經晌度等緊。
「點解咁快買電腦0既？」「你0地要用0丫嘛！」
「屋企有位擺咩？」「唔知0架！」
「有位插電制咩？」「唔知0架！」
「架電腦arm用0架啦？」「唔知0架！」
忽然諗起「先學知，再投資」。解釋一輪，明媽終於明白，屋企需要0既唔係desktop而係notebook。「咁不如打電話去電腦公司，改要架notebook啦，差唔多錢0者。」咁張電腦檯呢？「俾0左人囉，大把人想要！」明媽……做咩呢輪豪0左咁多呀？唔通因為四月出花紅？hehe~~