13-10-05

顏小姐0既歡送大會，總共擺0左8圍，凈係我0地間投注站，都已經坐0左三圍幾。我今朝一早就要返工，仲要返院舍進行清潔運動，所以放0左工都返屋企沖個涼、換件衫先，順便去d商場睇0下模型，準備入貨，之後先施施然咁到酒樓，七點都未到。

坐晌度等開席0既時候，強哥提議鋤大Dee，一檯呆坐0既成年男性舉手贊成，於是我、強哥、Marco同雄仔四個就開始「Dee王爭霸」(其餘成年男性圍住邊吹水邊睇)。其中一鋪真係唔講唔得：手上一拎起有紅心同葵扇A，仲有四隻Dee，跟住有四隻階磚牌，同一隻10、一隻J、一隻K，在場睇都0既都話「有冇搞錯」。呢副牌如果同其他人玩就可能好唔客氣咁大炒，不過一場同事，開心0下等開席0者，算啦~~~不過最後我都係大贏家，呵呵呵呵~~~

開席啦，真係餓到胃到穿埋，好衰唔衰坐0左晌最多仔果檯，全檯有11個仔，於是面對住一個唔夠食0既問題。好彩開席無耐，個個都掛住玩，都唔記得0左肚餓呢回事。

由第二道菜開始，契媽同芳姐已經開始醉0左咁，大呼小叫起身坐低，過0左個翅之後，仲走0左去主家席敬酒(不過契媽就叻啦，點基仔拎0左成pack啤酒過去，但係自己就飲橙汁……我過去同佢飲，佢鬧我「老母你都隊？你有冇搞錯呀？」)。之後我自己果檯都開始起哄，部長自斟自飲0左成支紅酒之後改飲可樂，強哥凈係見部長飲可樂唔見佢飲紅酒，所以係咁話「唔係0丫嘛部長，汽水？(拎住罐啤酒)0黎啦，呢個啦……」部長梗係唔肯啦，但係就帶動0左我0地果檯果堆仔0既「鬥酒意識」，以基仔為首四圍去撩人飲酒(但係個死仔果杯啤酒係溝0左七喜0既)，阿展亦唔知做咩係咁狂飲(俾人話佢借酒消愁，我話駛咩0丫，未開席阿展已經晌到打SMS啦)。我開頭亦唔想飲0架，一來第二日要返工，二來小晴都有0黎，費事飲醉0左送唔到佢返屋企，但係氣氛實在太開心啦，第二道菜上0左之後我個杯都換0左啤酒，之後不斷同人敬酒，大大話話都飲0左一打啤酒，搞到個人有少少暈。自從上次同Mabel姐聚餐之後，我都未試過玩到咁癲。

尚餘一絲清醒0既情況下離開酒樓，同小晴一齊返屋企。今晚佢完全冇理過我，就算我走埋過去，佢都冇同我講過0野，反而同其他同事有講有笑。哼！我要嬲、我要呷醋！我要好似細路咁詐嬌！(借醉發癲中……)