30-09-05

我0地個院長李姑娘正式調0左職啦！由院舍主管調0左去做中心主任。話說臨別在即，我個社工老細決定擇日同李姑娘食餐飯，就晌佢揀緊日子0既時候……

我：「不如20號0丫，到時新同事到0左，我0地三個(我、吳姑娘同梁姑娘)咪可以一齊去囉！」(因為我0地三個一定要有一個留守晌大本營)

社工老細：「咁遲……唔得，一定要你晌度返夜果晚！13號星期四啦！」

我(望一望個更期)(拍檯)：「好！果日我就唔返工！」

社工老細：「唔會0既……你唔會唔返工0既……」

我：「咩唔會呀！我上晝見工下晝見工夜晚0黎食飯囉！」

社工老細：「唔怕啦，一係你放九點，之後『飛的士』落0黎咪得囉！」

我：「你都痴線0既，不如你『飛的士』拎上0黎俾我食0丫！」

梁姑娘：「喂細路係唔係玩0野呀？你臨走都我都有請你食0野，你咁對我0地0丫？」

我：「我又唔係玩妳！(轉頭晌社工老細)總之果晚我就唔返！我睇0下你搵邊個當值！」

老實講，我又唔係第一次放九點之後『飛的士』去同同事食飯，之不過今次我係要落社工老細0既面，如果佢一開始唔係同我講「一定要你晌度返夜果晚」，我都唔會企到咁硬，反正我去，都係俾面李姑娘，關佢Q事咩！

順帶一提，成個過程李姑娘都企0左晌度睇住，但係佢都冇出果一句聲，任由社工老細俾我0既怒火炮轟；不過講真，社工老細又係抵死0既，「天作孽猶可存，自作孽不可活」，引火自焚，咪係呢d囉！