07-08-05

最近改0左電話，所以經常都要通知朋友新電話號碼。今日突然醒起我仲未同強哥聯絡，於是就用新電話號碼打俾佢，但突然我興起0左個整蠱佢0既念頭，於是晌一個food court入面，出現0左以下0既對話：

我：「喂請問係唔係XXX先生(強哥全名)呀？」

強：「er…係呀。」

我：「你好呀我係AC Nelson打電話0黎，想同你做個錄音訪問0架，唔知你介唔介意呢？」

強：「好0丫。」

我：「er先生請問你係用咩型號0既手提電話0既呢？」

強：「explorer。」

我：「咁先生你用咩台0既呢？」

強：「Sunday囉。」

我：「咁先生你通常用幾錢電話費0既呢？」

強：「大約$150啦。」

我：「好……咁先生我0地呢個訪問就完成0架啦，遲d我0地會send返一個短訊去你手提電話度，憑住個短訊你可以去任何一間Sunday門市換返一份小小0既記念品0既，多謝晒你0既幫忙。」

強：「哦，唔駛客氣。」講完之後真係收0左線……

呢個時候我身旁0既松子已經笑到收唔到口，佢即刻打返個電話俾強哥，強哥竟然話完全唔認得我把聲，佢以為真係AC Nelson打俾佢，如果換0左係其他公司佢一定會收線。

其實我冇諗過會做得晒成套戲，因為我估強哥會影出我把聲，之後同我講「玩夠未呀死仔」或者「好好玩啦、好好玩啦，你估我唔知係你呀」之類，估唔到佢認唔出我把聲，仲會咁認真咁做個「訪問」，搞到我都唔知點樣拆穿我自己。原來我0地真係咁耐冇見，耐到佢連我把聲都唔認得……