熱人下晡一陣涼風
透過兩排綠色ｅ
檨仔林　
玉井ｅ藍天　幾蕊白雲
當咧歇晝

樹仔跤　三五個猴囡仔
那喫檨仔　那聽阿土伯公仔
講古

彼時　清芳仔徛旗造反
講是　玉皇上帝大發慈悲
派伊落凡間　革
四跤仔ｅ命

西來庵ｅ香火
那來那旺　信眾
愈絞愈儕　
巡查大人ｅ尻川　
袂輸針咧捼(ui)

總是　鴨卵卡密嘛有縫
日本仔挲著總頭　扛
洋槍　大炮　給
神符遍地ｅ礁吧哖
殺到臭青荒

彼個天年　伯公仔猶未
出世　咱ｅ祖公仔
攏無在庄

聽講　恁即馬讀ｅ
國校仔　永過
逐暝　魔神仔成群結党
咧開party

冷風一陣　吹
兩粒檨仔　落(lak)落
拄好摃著　阿土伯公仔
雙爿肩胛頭

※2002.7.29 寫置枋橋街
　第十屆南瀛文學創作獎現代詩佳作