自己lunch...自己帶...
唔好睇少一個lunch的原動力呀！俗語有話：辛苦搵來自在食嘛…到下午的一餐就係打工仔補充精力的一餐，好多時啲同事未到食晏時間就要諗定，下晝訂咩飯或者去邊度食?!!…話明係老人家的森伯伯，當然好少午飯嗰餐出去食啦！話冇益喎～～哈哈哈！始終老人家的說話都未嘗冇道理嘅～～最近有個食安中心的調查話：出街食的碟頭飯含鈉（鹽）量都比較高，最高嗰三樣係…乾炒牛肉河粉、干燒伊麵、味菜排骨炒麵～三甲中我會揀干燒伊麵，好多時出街食都會揀！不過好在唔係太多外出食…一次半次由佢啦！！有啲人當然話食晏嗰餐避唔到，唯有叫食肆走汁啦…呢啲算唔算斬腳趾避沙蟲呢?!!........哈哈！
平時森伯伯帶的飯好清好清，基本上蕃薯、薯仔走唔甩，貪佢處理方便而且粗糧有益，間中都會換換口味來一個素雞飯！素雞有段時間唔太想食，好多時素雞都有陣味，不過近來有間素食店出品又唔錯，近近地超市都搵到，起碼冇乜怪味，試過隔一兩日冇整，即刻成舊變壞，即係冇咩防腐之類…隨後漸漸食多了～又諗住食素都好過食太多肉，近來又話咩巴西的雞、牛、羊又出事…用素做的雞冇事喇應該～?!!
素雞比人感覺冇咩味，我的處理方法會把素雞切粒或切片，開半碗水加鹽加少少糖或加少許豉油，變成有味的水把素雞粒放內浸浸，只要少少時間已經可以好入味，最後可以把素雞拎起去蒸，都算幾方便啦…
自己帶飯都帶咗唔少時日，雖然係煩啲啲，不過就可以食清啲、食平啲、仲有食得健康啲啲…
ykk
for some reason, I will not write the blog, but I will come to chat as long as I can :)
版主回應
Okay! I see…It's up to you.
anyway welcome you to chat on Sam blog…
ykk
森兄的素心聲, 我行我素, 自我素求, 健康之道, 好!
版主回應
KK兄見笑~~森伯食素冇咩要求,亦都唔講究!!求其簡單一餐就算,因為上班前要煮好~唔可以花款多多...
未有見你有更新網誌!!!希望你可以繼續寫啦~~
stella luk
香港是美食天堂，也是魔鬼的世界，咁多美食，點算？！
版主回應
所以港人都十分矛盾,面對美食前都徘徊在魔鬼與天使之間~~唯有忍吓口!!
搞一爺
Green Lunches 喎！人哋每周3餐，森伯每周7餐以上，你咪仲勁囉！
為咗減少病發， 痛到唔瞓得、唔食得、 唔返得工，食齋啲都值得啫。
咁你睇高（齡）自己又唔啱，心理健康都好重要。
版主回應
你都講得啱！可能有七餐以上係食素為主，都冇話勁唔勁為想食得清淡啲，到咗森伯呢個年紀食清啲將來唔需要太擔心三高問題！唔似一爺啲後生仔吔乜都可以嘛...真羡慕~~~
咩病發啫...講到咁難聽！！其實食唔食齋對痛症幫助不大,只係想個樣保持後生啲咋~~你知森伯一把年紀架啦~~
咩心理健康?!!又係你話,老就要認;打打就要企定定~~XXD
Ka Ka
森兄好有心機整飯呀！
好少吃素雞，成日將它當作豆腐看待，
如果加啲粟子可能會更加好味啲！
我好懶…為了節省時間，通常只會帶冷飯餸菜返公司食，好少特别整，哈哈哈…
版主回應
KaKa見笑嘞,其實煮呢種飯甚為簡單，啲材料砌晒放落去等蒸熟就得～嚴格嚟講都算懶人餐～哈哈哈
素雞同豆腐都係黃豆制品，所以外表同食物的營養都係差唔多...
我都鍾意食栗子,不過多數配蕃薯一齊食,覺得呢兩種食材夾啲！！
都唔算懶，好多人都會咁做，夜晚食咩餸就留起部份明天帶飯，我都試過啦！！
ykk
森兄, 其實有冇想過遲D入佛門, 餐餐有健康餐呢?
版主回應
佛門乃是清靜地，森伯豈敢冒犯…想食健康餐隨時都可以，自己DIY囉～
基爾
唔怪得森兄咁fit.....食清啲食平啲又食健康啲,何樂而不為呢^^
我見有公司同事用這種金屬飯盒,會放在pantry煲水果個電水缸頂,可以㷫返熱盒飯,不過我未試過...
版主回應
都唔係fit架，肥返少少大隻啲啲最理想…不過呢啲飯要忍受得淡味就幾好，色香味都欠奉！
我哋公司部水機已有熱水供應，所以冇煲水缸！叮飯同蒸飯都有排等，所以食室溫飯就算，慳番啲午飯時間…
搞一爺
清森寡肉飯。👍
着咗一半嘅鬼喺午餐時都係帶自己整嘅飯盒架。
Green Monday 好潮架。
唔好標籤咗係老人，揾日我要去平機會告你歧視。😂
版主回應
森伯就嚟到無肉無求的境界...哈哈哈
我又冇刻意留意啲鬼鬼是否自己帶飯!!我記得以前有位外籍同事只帶雜菜沙律當午餐,他是全素者~~~~~~
午餐先素,晚餐有肉(多數)!!唔算green monday
森伯叫你哋啲後生嘅做伯伯就歧視,自己叫返自己係正視喎!!!
man-man
少肉健康D，我有時都會食下齊飯架。
版主回應
對呀~~我下午嗰餐多數食素,晚飯才吃肉,目的都係想飲食平均...
ohtria
森兄係咪唔叮飯架?
版主回應
你又知道...因為公司叮飯時間要排隊~~
唔叮喇~食室溫飯好過!!
for some reason, I will not write the blog, but I will come to chat as long as I can :)
anyway welcome you to chat on Sam blog… 2017-04-04 12:21:10