暢談廣東話…
最近有報導話有電視台買嘅外購節目，已經唔再配廣東話，就會以原聲播出…呢樣又唔知係真係假！唔通真係有一日廣東話會被邊緣化…
其實對於森伯嚟講，廣東話就係母語，兩文三語中，唯獨廣東話應該係最流利！英語就馬馬虎虎啦！都不斷學習緊…基本上普通話能聽，應付幾句無乜問題嘅～但要達到流利嘅階段就要多多練習！始終冇在外地住過生活過，又好難去學習母語以外的另一種語言！假設要迫我去英國、美國住，或者會在幾年間曉講英文，不過就未必辣辣聲，話晒過去殖民地年代都學過吓基本英文，起碼都有個底！如果唔係工作上應用到，又未必有股動力去學！至於普通話，對港人應該唔太難，有些字音只係廣東話歪少少…聽起來都略知一二係咩意思，記得曾經都學過普通話，所以到現在都能夠勉強運用！！要學好語言，個動機動力先至最重要！
雖然廣東話係一種方言，但係佢都代表一個地方，一個地方的住民！有時覺得自己能操流利的廣東話都好自豪，因為在眾多語言中，廣東話係好難學，每個讀音都要字正腔圓，咬字一定要清晰！懶音就另計啦～哈哈哈
其實今時今日，相信英文或者普通話都要好好學，而廣東話更加要我哋好好去衛護先得！所以今篇Blog會以純廣東話寫出…
man-man
我都認為廣東話應該流傳下去。
ykk
ykk只識廣東話, 其他語言真係麻麻地, 普通話就更不成 :(
版主回應
我諗你謙啫~~
以我覺得KK兄的英文唔錯，出口成文…
相比之下森伯只係識26個字母~~~><
Gael
利字當頭,兩文三語都學好始終非常有益處,方便溝通
如有興趣研究中國古典文學愛讀詩詞的,懂粵語是個很大的優勢,因為粵語比普通話保留更多唐宋古音和入聲韻,如果森兄有機會坐時光機返到唐宋時代遇上李白蘇軾可能驚覺無乜語言隔賅XXXD
事實上目前能說粵語的人口包括粵穗港澳、東南亞和海外等多達逾億,幾乎等同日語韓語的人口數量,場市依然好大呢
版主回應
能學好就當然好喇…不過學語言都好講天份！若果唔能夠時時講好易忘記…
呢個你唔講唔知，中國有咁多方言可能有些語言，是由古代留存至今，出現音韻相同都唔出奇！所以每一種方言，可能保留住一啲歷史、文化、知識等等…
如果有機會坐時光機，咁就好多選擇嘞…未必想返到唐宋時代喎！哈哈哈
剩係一個廣東地區都好多人講廣東話啦！！相信要變都唔係香港變先，不過話到頭來都希望廣府話繼續好好傳承落去…
ka ka
頭先要落車，而家再寫過，有時見D鬼佬講普通話好勁，自己也覺慚愧！你知否內地普通程度的人的語文能力俾我地强的原因嗎？，就是囗寫我心，不用像我們再左稔又稔文字通顺與否！
純粹為曾經此苦而吐苦水而已，
大前題當然要撑廣東話喇！(好似有點矛盾添！哈哈哈…)
版主回應
聽講話鬼佬用的普通話拼音跟英語差唔多，都係由字母併出來，所以他們學普通話易好多！
有時都會架～見到鬼鬼能操流利普通話，自己就甩甩咳咳，所以的起心肝學好普通話，應該我哋都有優勢…
呢個當然係其中之一啦，而我哋新一代又見多用多玩食字，同音字混淆，又講潮語，而新一代父母又著重子女英文，忽視中文…咁多因由文章寫得好先出奇！！
ka ka
我比較鍾意睇以原聲播出的節目或劇集，配了廣東話像打了折扣，無咁原汁原味囉！咁…廣東話係母語一定要撑喇！除了大勢所趨外，我係贊成下一代學好普通話的，因為一出口已成文章，口寫我心。
版主回應
你的講法也認同，但有些觀眾未必喜歡追字幕，外語又完全聽不懂，配上粵語睇起來比較明白而且又多分親切感呢！當然啦～撐廣東話之餘亦要多學習其他語言。係呀！用開普通話對寫文章有很大的幫助，因為普通話很多時就係書面語～
搞一爺
經歴話畀聽語言係學以致用，學咗冇用會唔記得，同智商冇關，生活環境要講嘅就會學識啦！唔駛好叻，溝通到就得，工作上英語冇問題，反而係閑聊上會有時唔明佢講乜，所以，冇需要又冇興趣嘅嘢，我唔會晒時間學架。
我工作時有用過啲剛畢業嘅，點知有個男仔啲國語好鬼難聽，我仲質疑係我嘅聽力好差，原來有問題係佢，同佢老好幾輩同鄉傾開至知佢有好重嘅西安口音，我問點解咁後生都會有咁濃嘅方言，佢話佢哋日常會用西安話溝通包括教書，如果冇離開過西安出外闖蕩，佢自己又唔練好國語，就會唔多識講國語，用西安話歪少少。
有哋廣東同事都好怕講國語，因為佢哋都好小機會用到，唔識點講，仲要我同佢翻譯（成機讚吓自己），我就最了解佢哋，我仲笑佢哋講嘅國語我會聽到90％明白，因為佢哋同我哋一樣用廣東話歪啲音就照講國語。
我試過做個國語發音test,問幾個同事呢一個字點講，結果係幾個同事發音都有差異，我咪話我講嘅可能係最標準嘅，係佢哋發音唔正確，唔識講國語唔好教壞我，唔好質疑我發音唔準，真係好搞笑架。
所以，有啲人好抗拒大陸，有人建議用普通話教學（不過我覺得英語教學對我們更有利，有廣東話基楚，普通話日後學都得），就話大陸化香港，我係好唔認同，都係想多啲時間講咪好啲囉，我覺得要互相溝通就要有共同語言，依家都有好多地方話如上海話，客家話，潮州話……，唔統一語言都好大鑊，點只七國咁亂。
版主回應
@@...@@...@@...乜解救?!!字數仲多過我篇Blog…..
‧認同~~學以致用最重要, 如果用唔到好快就會唔記得~~學咗等如冇學!!好多時,所學的東西,第一要用得著（有需要）, 第二要有興趣（原動力）,咁樣先至會容易成功學識…
‧西安話歪少少講國語…畀我完全聽唔到!!你算好好嘢!!我覺得你呢位西安同事母語係西安話冇問題, 但出來做事學多樣語言傍身都係好…
‧你勁喎, 同你班廣東同事翻譯~~學語言最重要係多聽多講, 總有成績見到!!基本上我哋香港的廣東話都係來自廣東地區, 講的國語又差唔多, 可能咁樣就可以溝通到~~哈哈
‧原來你的普通話發音咁標準, 咁你咪受到老闆特別厚待同重用…專負責國內的project!!有前境喎~~
‧以前聽人講過, 有得學梗係要學好英文, 普通話第日驚唔識咩~~但估唔到呢一日已經嚟到呢!!XXD有時唔好理係為工作也好, 為未來鋪路也好, 為適應生活也好,學多樣語言對自己總係好嘅~~仲有統一語言係好, 只要方便溝通就會機會處處, 但方言都唔好忽略, 就算上海話,客家話等等, 都有值得保留的文化同價值~~第日冇人知講乜, 好多文化知識資料都失傳…就好似廣東話咁!!!
ohtria
Therefore my blog is only in Cantonese.
版主回應
唔怪得咁多人鍾意睇王子blog喇~夠晒親切感!!!
stella luk
我撑廣東話！
我都認為廣東話應該流傳下去。