呢幾日應該最Hit的話題都離唔開個「凍」字！今日先聽到有人想好似細路仔唔駛返學…當然大人就唔想返工喇！雖然呢個時候最溫暖莫過於個被竇…之不過生活仍要繼續，工作仍須努力～清晨五點幾都要起身！其實前晚都已經感到幾凍，昨日（日間）在房中的時鐘溫度計已錄得有記憶以來最凍，得七度！相信外邊的氣溫應該再凍幾度！森老伯當然要摷返抓毛褸＋暖風機出嚟啦！！話晒都係老人禦寒之寶嘛！啲人話老人家冷親就大劑…所以長者森都要保吓暖！XXD

俗語有云：唔滾…唔係！唔係！係唔凍唔知身體好，當你若果在天冷時唔需要著太多衫，唔需要冚太厚被，沖涼又唔需要太熱的水～都足以證明身體幾fit吓！聽人講話食羊肉就可以保暖，但自己真係未試過在天冷時食羊肉…所以冇乜經驗之談，但我試過食薯類（重澱粉類），食完真係成身暖！素得嚟又健康唔錯～～

港人最興一窩蜂，就算睇冰都要一窩蜂上山頂睇，結果唔舒服都要人拯救啦！忽然想起打風去海邊睇浪…呢啲活動都係唔適合森老伯，年紀大，隨時機器壞！唔好話上到山頂跣返落嚟，就算在家中都隨時唔多掂！…之前已提到老人寒冬兩寶，餘下一寶就係平安鐘，諗吓今晚都唔知要唔要撳Iu…

唔知係咪凍一凍個人都精神啲！今日狀態都幾OK咁喎～～