森之“周”記！
周身汗…
呢幾日真係好熱，早前有個超級颱風吹向台灣，令到附近鄰國地方都變得熱辣辣，香港也不能幸免，早幾日先見四周矇矇哋，但已經非常之熱，唔好話出一陣街，就算在家都渾身是汗，所以一年四季最怕是夏季！尤其家陣熱的日子越來越多，好在森伯唔算豐滿的人，若然豐滿人士相信都會幾辛苦！我發覺呢排最舒服就有兩個時段，分別係沖完涼同臨瞓前…
周身痛…
可能昨晚瞓得唔太好，今早起身即見“瞓嚟頸”，本身“瞓嚟頸”都已經幾難受，仲要加埋背肋位置痛，所以會瞓得唔好都唔奇…頸梗梗加上背梗梗真係有啲似機械人Robi架～哈哈！我諗同虛火熱氣有關，通常一熱氣就墜骨火，可能森伯伯燥底，食多少少熱氣嘢即中招！或者都係時候飲番杯清熱潤燥的蜜糖水，因為既簡單又唔需要煲，因為真係冇咩時間去煲涼茶…
周身忙…
查實工作好耐都冇試過咁忙碌，始終有得忙好過冇得忙，若然在公司太過悠閒反而仲驚啦！但係有時又最怕太趕的急件，所定的期限又唔多…所以都要自己度掂佢！想要爭取多啲時間，唯有拎返屋企繼續做，一返工就拎住一包二包，感覺好似穿膠花年代，攞啲手作返屋企幫補家計…好在係畫稿啫，唔駛好大袋～如果超時當OT就好起碼做得醒神啲啲，順便幫補吓森伯嘅生計都好呀～
搞一爺
唔駛啦！
搞一爺
原來冇登記嘅用家係睇唔翻自己發嘅 俏俏話嘅內容。
版主回應
係呀！有好多blog友都察覺～除非係本站有帳戶！
我已經睇了留言並回應，若果想睇翻你可以給我一個聯絡方法（電郵之類…）
(悄悄話)
ykk
森兄, 有咁多森層次意見, 梗有一樣啱洗!
版主回應
對呀!!森層次意見仲有一樣,就係KK介紹嘅鬼佬涼茶--啤酒!!同樣可以清熱氣~~yeah!!
Gael
有點慚愧其實都無乜「實質意見」畀到森兄,大多數只係吹水:P
不過很同意開心閒聊互相交流下最緊要嘅
版主回應
既然gael兄自己開口講就最好!!咁日後就畀多啲實質意見都唔遲!!哈哈哈
開心閒聊咁開心!!...唔怪之得有咁多Blog友搵gael兄傾偈啦!!!!!
狂小子Time Is Changing
森伯試下煲下粉葛赤小豆呀！好有效架！
版主回應
都聽過...聽聞好有效~~
不過煲湯比煲涼茶要用更多時間喎...
amour
夏天，動一動，就揮汗如雨，所以我盡量留在家裏！
忙完，休息下……再拼！
版主回應
在家千日好嘛!!哈哈~~若然外出的地方冇冷氣就著啲通爽,薄的衣物...可以減低個人溫度!
多謝阿摩!睇怕要忙多一陣!!
ykk
ykk特發奇想之森之周記, 周二, 周四, 同末通通都中晒六合彩. 即刻飛去北海道避暑, 跟住去泰國揼骨, 返嚟收購番公司, 請人做晒自己工作忙部分, 自己做指揮, 到時人忙森不忙, 又有人生寄託.
版主回應
哈哈...KK諗得太理想~~今晚發吓夢都可以!!
乜平時KK的生活是這樣麼?!!好嘆喎!!
其實一周平平淡淡已經是最好,對森伯來講平淡是福~不過森伯係福--福頭個福XXD
搞一爺
你畀人工我至做森仔代言人。你諗多咗喇，！要夾得埋至可傾多兩句，唔係搞到大家唔開心就唔好啦。
我淨係識濕熱同熱氣，虛火唔知喎！會點架？
咁要升你職做主管，教吓班手下點樣高效率完成工作，可以喺公司悠閒。
版主回應
點請得一爺起呀?!!哈哈...大家在網上都係傾吓偈,都冇話開心唔開心,有時真係畀到一啲實質意見架!!一爺係其中之一,阿gael兄都係啦!!
當感到個人好燥熱,無厘頭啲骨頭痛都可能虛火做成,通常飲吓啲清涼嘢就會一兩日症狀就會漸減~~
你今次兜唔住啦!我啲工作做自己嘢,某下屬架!!淨呢個point都某乜說服力~~~
新聞台Blog小天使
親愛的台長︰
恭喜您！此篇文章極為優質，獲選為本日哈燒文章，將會出現在新聞台首頁哈燒文章區塊輪播。請您繼續保持每日撰寫文章的好習慣，期待您提供讀者更多精采的內容，加油！
版主回應
多謝新聞台對森blog的支持~~會繼續寫好自己個網誌!!
謝謝鼓勵!!
ykk
不用為天氣森煩火燥,上星期六已立秋, 相信暑熱快過!
版主回應
聽講話立秋仲熱,在香港熱到九月尾就開始有少少秋意~~
ykk
工作上, 人閒森不閒都是好事, 起碼公司睇得起.
版主回應
就係公司睇唔起先至投閒置散咋!!><
工作量亦唔到自己話事架~~
ykk
森肌梗塞,頸痛腰酸,最好就是做物理治療或針炙呀!
版主回應
森肌梗塞唔可以亂講...C得人架!!!哈哈哈
針炙有需要時都想試下!!
ohtria
HK好方便涼茶去涼茶鋪飲嘛.
版主回應
森伯條友仔好麻煩，唔係自己落嘅藥材唔敢飲！
stellaluk
周身汗遇上周身痛，咁想唔忙都唔得啦！
版主回應
周身汗加周身痛，真是極大煎熬…
唯有見步行步咋!!!
搞一爺
熱到融，歎冷氣、凍飲、食雪糕、凍生果消暑。
年齡大唔做運動都要拉筋可減低周身痛。
能者多勞。
版主回應
你好似幫我答以上位blog友咁嘅？！哈哈哈！
- 你講嘅係夏日指定動作，必做！
- 森老伯朝朝會郁吓架啦～有得拉嘅筋都一早拉咗～係虛火做成！
- 能者多勞？！……有時在公司悠悠閒閒你又點兜呢？！
Gael
汗:咁會唔會有啲咩消暑妙方?
痛:搵人揼吓骨XXD
忙:咁如果可以拎返屋企做都好丫
版主回應
- 都冇咩特別消暑妙方，睇怕都要揀森靜自然涼～
- 家陣已經好似畀人打咗一身，仲要畀人揼！XXD
- 怕做唔切，唯有迫住返家做，可以追返時間！
唔駛啦！