齋剪唔洗頭…
為要迎接個summer
look，好應該都要執番正個人…絕對唔敢奢求型過人…只係希望畀人一個自然感覺咁啦！
眼見自己有少少露宿feel，或者都係時候要剪剪髮！一向頭髮都長得快，發覺自己長髮唔長肉，真係應驗一句：人窮志短；馬瘦毛長……森伯咪就係嗰隻馬囉！XXD
男士剪髮最簡單，唔會好似女士理髮咁多選擇！…通常男士就咁剪短就可以，頂多兩邊剷下青…唔駛搞咁多，尤其森伯個look越簡單越好睇，若然搞太多就會越多嘢越騎呢…XXXXXD所以我都唔需要揀師傅，除非個師傅特別剪得靚，不過暫時仲未遇到！仲有…我唔知係怪癖定係已成習慣…去到理髮店我係唔會洗頭！寧願師傅幫我噴濕個頭先再修剪…通常剪完髮先返歸洗頭～所以每次剪個頭幾個字就搞掂，可能自己老人家！唔需要去理髮店太密，大概兩個月先要再去幫襯…
現在的salon跟以前的理髮店，外觀已經好大唔同，但髮廊的標誌就十年不變…從老遠望到呢個轉轉轉（唔知這個有冇一個正式的名，如知道可告之森伯），就知有間髮廊響左近！
每次剪完髮，都感覺輕鬆咗…起碼可以清清爽爽迎接悠長的Hot Summer！
註：相中的髮廊並不是森伯幫襯開，不過就畀店外的轉轉轉所吸引……
kammy
我大半年先剪一次,碎陰自己剪,都ok呀~森伯有無去書展呀~好多平書仔呀, 我岩岩先去完~^^~
版主回應
好耐冇見喇~~希望你生活愉快...
女仔大半年先剪一次冇咩所謂,當留長髮!!男的就要保持短髮清爽,就要隔一段時間修一修嘞~
書展想去,不過每每想到好多人迫就打消念頭,而且買得書多冇咩位放~~
搞一爺
假如我係60歲，上二代都係多仔公，父子相距30年，爺爺出生喺
2015-60-30-30=1895 即係光緒21年，民國元年係1912，17歲有辮好正常喎！ 森仔年輕先至覺得冇可能啫！我係黑白相時代，又真係老過你呢代彩色相時代。
如果我年輕啲，個博客名就叫搞一少啦！我都認老架。興幸，外表，身體同心境比真實年歲後生拾幾年，咁樣先重要。
版主回應
你的假如…會唔會講多咗好多年呢?!!哈哈
可能你伯yeah，講的是你太爺呀？！男人冇咗頭上條辮都好耐歷史…如果仲留到現在，可以放到歷史博物館畀人參觀…
我都有黑白相０架！玩吓手可能同你同年代,或者比你更早都唔定……老唔老是睇心境，我覺得你仲好young！！
搞一爺
我都未見過阿爺，聽阿爸咁講。阿爸年歲再加對上咁多個家姐，估計係清未人。
如果森仔講得出有邊個老人平頭裝會型爆？我就相信你唔係擦鞋啦！
版主回應
哈哈～冇咁遠古呀？！清末差唔多係慈禧，咸豐，光緒年代喎…
邊得咁多鞋要刷丫…係真心講，後生仔剪咩髮都型架啦！不過都梗有例外…
正如老人家都有剪得型的skinhead！自信心勝於一切呀！
鵝哥
套用鄧伯伯的黑白貓論: 瘦馬肥馬冇所謂, 跑得出就係好馬｡
至而理髮, 我幾十年冇入過理髮店, 一直自己剪, 由於天生鬈髮, 剪崩一忽都睇唔出｡
順便問一句: 為何回應要人填咁多資料, 又email address, 又識別碼. 提議簡化下啦.
版主回應
鵝哥連鄧伯伯的經典句語都搬出來，實冇得抝啦！哈哈哈
其實可以自己動手剪最好，剪耐了知道點剪最啱自己……
基本上有粒星是必要填，其他（例如電郵等）可以不填架！
代PChome向你講聲唔好意思啦，有時有咩問題都好難向PChome反映…
搞一爺
森仔要梳靚仔頭，呢種長度最麻煩係瞓醒又趕住番工偏偏有撮頭髮豎起哂，要搞一排至貼服，後生仔當然要靚啲。
反正我咁老 長短髮都係咁，我揀剪短到唔駛梳頭，懶得打理。後生時興長髮都有跟架，怕人哋話我老土，老咗少理人哋眼光同閑言閑語，活出真我。
我都係兩個月剪一次，我接受範圍大，假髮至剪密啲驚畀人發現有哋唔悉長。
我阿爸話阿爺係有條長辮，已經剪咗放喺櫃桶，以前無電風筒，咁長洗完頭都等好長時間至乾，真係辛苦。
版主回應
哈哈哈，好怕遇到呢個棘手問題，有時真係好想將嗰一撮頭髮剪咗去…聽長輩講話頭髮硬代表難教（唔服從）…睇森伯都知係麻煩友啦!又幾啱喎~~XXXD
通常會將竪起嗰撮頭髮用少少熱水刷刷，等待乾了又會回復貼服…
我覺得無論咩年紀，髮型都好重要！剪個適合自己的髮型可以令人眼前一亮…一爺剪個平頭裝（skinhead）頭又唔駛梳又型爆直情好啦！所以你哋後生仔有好處，剪咩都好睇！！
若然森伯老人家剪skinhead，啲人只會覺得地中海咋…
真定假呀？！你爺爺有條長辮？！…
Gael
近年都越開越多五六十蚊齋剪快靚正
版主回應
呢種快速剪髮好似話由日本傳來…
對唔太高要求人士, 應該幾啱~~
我都試過剪, 不過靚正就有少少保留嘞…
ohtria
I have just googled. That thing is called Barber's pole.
版主回應
thanks for your answer!! I know more now`^ ^
that thing had chinese name??
man-man
近排咁熱，我都想去剪短頭髮，剪個游水LOOK都好喎。不過剪咁短，都係諗諗先！
版主回應
哈哈，你哋啲年青人唔係想做就去做咩？！
不過真係今個夏天好熱，我都好想剷到陸軍裝，頭都唔駛梳…XXD
搞一爺
年青森仔仲未有老人白髮問題！
好多年前有個同事染金髮，有個鬼佬客人行過見到仲以為我哋請咗外國人做野，真係搞笑。
版主回應
現在有很多人都有白髮問題, 染髮相當普遍啫~~不過染金髮就未必個個都適合…尤其中國人啦…
可能你個同事本身個樣都有啲鬼鬼哋卦!!
如心恕也
我已好久沒幫襯理髪店，皆因我只喜歡一種髮型那就是短髪的平頭裝，所以自己也可以攪掂，而我比你耐些，三個月多啲剪一次！
版主回應
如果能夠自己動手梗好啦，起碼知道自己想點剪嘛～平頭裝夏天舒服，而且亦有你的個人風格～～唔錯！！
我兩個多月才剪一次都有人話耐…
ykk
納吓眼, 以為森兄講搵錢, 齋揾唔洗多果頭.
可唔可以影番張理髮後的靚仔相, 給大家睇吓好唔好??????
版主回應
在森伯本字典裡, 邊有搵錢多過頭呢回事丫…
呢種情況只有在KK兄才會啫!!
剪完髮張相, 費時失禮晒大家啦~~哈哈哈哈
我大半年先剪一次,碎陰自己剪,都ok呀~森伯有無去書展呀~好多平書仔呀, 我岩岩先去完~^^~
女仔大半年先剪一次冇咩所謂,當留長髮!!男的就要保持短髮清爽,就要隔一段時間修一修嘞~
書展想去,不過每每想到好多人迫就打消念頭,而且買得書多冇咩位放~~ 2015-07-20 09:17:49