煩事時時有（上）…
又唔知大家有冇畀隻小鸚鵡悶親，可能大家都已經冇路過森情小品，又或者已經唔記得有呢個Blog的存在…哈哈哈哈呢排冇寫Blog最主要的原因唔係森伯伯懶，而係根本唔講得上有咩森情寫Blog，費事同個網誌名唔符合…話明森情小品，梗係有森情先有嘢講嘛～
所謂煩事時時有，就撮要同大家分享吓：
話說秋冬是乾燥時節，皮膚易乾燥就一般人都知，或者長者更加乾啦！哈哈！！好易就會搔損都唔知！初時都冇咩為意，但見腳面上的傷口咁耐都冇咩痊癒的跡象…心裡都已經覺得好奇怪，唔係講十日八日，係以星期來計算…你話誇唔誇張呢？今趟點都要拜會醫生…咁大個人都未為過一個小傷口去睇醫生，相信都要破吓例……雖則話一個小傷口，但都費我唔少精神～～
醫生開了抗生素，連同一支小藥膏畀我，仲要我去洗吓傷口～擾擾攘攘都搞了一段日子，唔好以為好咗好多…感覺上都係差唔多～其實個傷口並不可怕，最怕反而係有咩其他問題…第一時間就諗到會唔會糖尿尿呢？！就算幾唔願意都好，都要去驗驗，雖然見醫生時醫生冇提過…算是自發性去驗～啲驗身中心都有驗身套餐，我諗都唔需要乜都驗，只是簡單驗空腹血糖就算！驗之前唔可以食嘢6-8個鐘，記得自己食完晚飯就乜都唔食，其實空腹期間齋飲清水都可以，咁我就第二朝唔吔早餐，飲完杯清水後就連水都唔飲，諗下自己都去得幾盡…XXD我諗嗰日都空腹咗十幾個鐘～～去到驗身中心後，填完超簡單的Form後就付上檢查費（費用唔太貴，可能我驗的好簡單…），最後畀我的收據就連個名都寫錯！已經有id-card畀佢睇過也寫錯（擰晒頭）…都可算奇人奇遇～XXD順帶一提：張Form仲有一欄寫收取份報告想以咩形式：電話、電郵、信函、自取…我揀自取！應該冇咁驚驚～哈哈哈哈
唔係公家醫療的效率就特別慢，都要等幾日先有！見到份報告嗰result…係normal range…總算放下森頭呢舊大石！再look look個名先……都依然係串錯咗！做戲就有啫，估唔到戲如人生…真係（call now yeah可怒也）XXXD咁呢份報告係唔係森伯嘅先?!! 哈哈哈
聽落以為好輕鬆好好笑，查實真正的森伯笑都笑唔齣…呢一排只可用「凝重」兩個字來形容！到最後我覺得係可能細菌感染，所以咁長手尾～～
AMOUR
TAKE CARE
ykk
冇事就好! 羊年行好運, 足報平安. 森身健康!
版主回應
多謝KK兄~~一切承你貴言...
我都祝你羊年得意,日日喜氣洋洋~~
ykk
森兄, May在ykk blog 的"如果"POST 內給你留言.
版主回應
你唔講可能冇睇到她的留言,現在就去睇睇...
BIM
保重，少吃刺激性或辣食物，煎炸嘢都適可而且。相信係遇到隻惡菌，森兄放心。祝早日痊癒
版主回應
記得護士都有提到有些食物要忌口，印象中所講的我都好少吃，所以沒有記在腦...平時都冇乜食辣或煎炸嘢~~~可能畀難搞的細菌感染了~~
多謝BIM兄關心，情況現在OK...
搞一爺
醫生話長者做手術風險大，如果唔係必要嘅，最好少做。老人家知道自己果頭近最怕入醫院，每次入去驚住係有入無出，唔想做。開刀做手術咪又多個傷口。唔做通波仔除咗傷口龜速恢復，又無乜其他唔妥喎！手術費要十萬八萬，老人家話自己係部十幾年嘅電器，花錢修理番都唔捱得好耐，醫番晒藥費，生活過得一日得一日，將筆錢買鍾意嘅野食落個肚仲開心。人生不同階段對同一件事睇法做法係應該不同嘅。
老年生活乜野都慢慢行，復原能力都好慢，病情會反反覆覆，時好時壞，變差快、變好難，身體永遠同自己作對唔聽駛。最後，喺醫院碰到個護理傷口好有經驗嘅治療護士，做咗二次激光照射，話激活細胞，好似叫番醒佢哋，又識得觀察傷口嘅變化轉用不同嘅敷料，咁就好番，唔誇張係幾年。
所以，到咗老人階段就樣樣都要小心，注意保暖，日日做運動，小心飲食，打好個底佢，做好預防工作，一旦出事就手尾長，同老人家生活就係可以親身體會呢個階段應該會點、係點樣過活。生老病死係人生必經嘅階段，我想到我老時都可以調節好心情，開開心心面對老病死，唔會心煩氣燥、悶悶不樂。
版主回應
有成篇Blog咁長喎～～＠＠
其實我都係睇到有關的報導，唔知這種手術有冇風險，但對一個病人來講，有得醫總比冇得醫好，要有成果都要搏一搏架啦！但好唔同意人老就唔需要醫好，有時錢財都係身外物，唔通有咩比身體更重要呢？
或者人真係似部機器，但整好番副偈，又可以再用多幾年，始終冇人知道啱啱買回來的電器，可以用得幾耐...一年唔定，十年唔定，幾十年都唔定...
有時都唔奇，復原要時間...搞吓搞吓又幾年！病痛嘅嘢邊有人話得埋呢！
你講的老人家心態，真係森伯伯的寫照...
有時入醫院都驚打直入打橫出呀...><
有一爺的照顧，相信家中的老人家在晚年都感到開心，恩惠～反而覺得老人家最開心的時候，就是有親人伴旁在側！大家的歡樂時間，就是他們的精神力量支柱...
kammy
天氣乾燥唔好亂搔,會好容搔損呀...要塗多d潤滑露會好好多...
版主回應
潤吓膏相信在秋冬季唔懶得～真係冇估到搔損的地方要搞到咁麻煩...哈哈
kaka
要keep住去洗傷口呀！會快D好番架！
有個friend都試過整親腳趾，好耐都唔好...要一星期去幾次洗傷口先好番！
而家D菌好利害...要小心D處理傷口呀！
版主回應
早排就已經成日去洗，我諗始終醫護人員比較多呢方面的經驗…
有時整損的地方，都要畀畀時間佢休養生息…急唔嚟！！
又唔知家陣啲菌係咪特別惡，總之小心處理為上～～
Rose
食哂d藥，仲未好! 去睇過第二個醫生!
版主回應
其實抗生素一早食晒~~佢嘅問題唔係在食咩藥,係點樣打理個傷口...
若有需要都會攞番份報告畀醫生睇!!呢個就是驗身嘅目的~~
ohtria
沖完涼未抺身前搽凡士林皮膚冇咁乾架.
版主回應
咁講凡士林又幾好,有機會買來試試~~
未用過,覺得好立...
kaka
睇多個醫生再check check好D喎！
版主回應
多謝關心~~
我睇嘅唔係診所仔的醫生,係醫院醫生...
搞一爺
啲人話男人護膚係姿整，其實，冇做好就會好易整損，同時，爆拆都好唔舒服，我都有搽到凡士林護膚。
咁啱屋企有個老人家又係腳損咗好幾年至好番，醫生話係塞咗血管，少咗血流去傷口。想快啲好番，洗傷口啲醫護人士教：
（1）食多啲蛋白質，食肉生肉。
（2）傷口唔好濕水。
（3）唔好成日壓住個傷口。（對鞋唔好太緊，可以著拖鞋就好喇！）
我自己加第四點
（4）有血到腳先至快好，所以，要保暖同做腳部運動，腳凍凍邊有血到，運動就加速血液運行。
版主回應
其實男人護膚一啲都唔姿整...尤其是呢種天氣!!的確有需要~~感覺凡士林好蠟,搽了好似有層膠封住皮膚~~我用橄欖油,或椰子油...比較自然冇咁立,或者搵日去藥房買番罌試吓~~
要幾年至好番?!!@@...所以好怕長手尾的病痛!!
聽聞話香港某大醫院可以幫患者通血管,改善病人的情況喎...
我家陣呢個情況仲揀飲擇食咩!!食多咗肉啦~~
傷口個位置又唔會壓住嘅~而且傷處好細!!
血液循環好重要,所以會Keep住郁,和溫暖!!
多謝你詳細意見~~有些都可以用得著!!
stellaluk
森兄一定似套戲咁，最後無事！
Gael
雖然無糖尿不過新年就到,森兄都係盡量食清啲,唔好食咁多糖和肥膩野,應該都無咩問題嘅
版主回應
平時食野嘅清單,就真係清單...清到你唔信~~
食甜野肥膩野就更加少啦!!所以先至咁擔心~~~
TAKE CARE