森伯搽油…
大家唔駛掩鼻彈開十尺遠喎，森伯唔係搽驅風油！只係想講下自己食咩油～～自從地溝油事件簿發生之後（查實一路都存在，只係啲人後知後覺～），有人覺得食肆的生意都少了，港人就有個好處，隔一排就乜都會唔記得（仿似森伯的腦退化症）…故態復萌XXXD
講開食油，外出用膳就一定唔到自己控制，但自家製作，食材質素、份量都可以自己話事！！自己食用橄欖油都有一段長時間了，坊間都有很多健康食油選擇，不過自己又覺得橄欖油比較清純，不會油膩膩，感覺都唔錯～不過橄欖油不適合太高溫的烹調，所以煎煎炸炸就唔得，油商都有供應可以煎炸炒的橄欖油，之不過要烹煮太高溫的餸菜，都有其他油可以選擇……
據資料所講，食用橄欖油的人原是地中海一帶，而當地人的心臟病發率都較其他地區的人少，所以令人聯想到橄欖油可減少心臟病的發生，再睇資料以前地中海的人食物偏植物性，紅肉只是佔少少比例…咁心臟病自然少啦！又未必全關橄欖油的事喎～哈哈！道理即是話就算食橄欖油，都要配合健康的食材，才有滿意的效果！
橄欖油可以生食，通常用來搽麵包或做沙律等…既然講開橄欖油，就即時諗到一個既簡單又好味的食法，推薦畀大家～只要適量的初榨橄欖油，加上少許食鹽（可以唔要）再加上葱花，咁就成為＂葱油醬＂！
用來搽麵包食唔錯！！超推介…加塊炒蛋或芝士，更加好味又夠營養～
而家的人一聽到油就好驚，其實每個人都需要油份，就好似現在秋天已經來到，若果個人冇乜油份就會好易乾燥（臉上乾紋一出！個人即時顯得老十幾廿倍…呢句先最驚驚呀…XXXXD），所以正常地食用健康的油都會有好處！！
Time Is Changing
現在在家吃多數都會走油。
版主回應
在家吃多數走油(有益油)??!!出去吃就唔走油(冇益油)??!!
係唔係應該掉轉呢??!!哈哈哈
Rose
呢款油用過!宜家葵花子油多!
版主回應
相信每種油,都有其營養價值...除了人造牛油~~
BIM
對！diet中攝取適量油是重要的。
多數我出外食西餐就會試醋，油點麵包。好正
版主回應
完全無油無糖無鹽...唔得~~樣樣適當吸取就最好!!
初時用橄欖油點麵包以為淡淡地,原來估唔到咁好味!!
kammy
謝謝森伯講我知^^ 我其實真係唔知的... 因為我整蛋糕仔都係蛋糕材料店一次過買哂,佢地多數得一種橄欖油,而且我唔係經常整,朋友仔又係食多過整,所以無人問...呢家知道左以後又多個選擇了~^^~
版主回應
唔好客氣...森伯只能識多少就講多少而已~~整蛋糕仔我會用奶油(純正牛油),而非人造牛油(Margarine)~~用橄欖油就純為健康,冇咩味!!我冇焗爐,若果做蛋糕都係靠個電飯煲,佢有焗蛋糕的功能~~有機會必會請教你!!
man-man
乾燥天氣少D油水都唔得呀！
版主回應
完全正確~成個人會乾晒,作適當的補充是需要!!
搞一爺
後生仔，讀書時你有冇讀過 尺牘 架？ 點會稱呼老人家為 “杯” （boy）架！
版主回應
雖然森伯係老人家,但也未讀過尺牘!!總之後生過森伯的朋友都稱為boy...啲人會開心ｄ～哈哈
ykk
多吃橄欖油，可森臟健康。葱油麵包有新意。
版主回應
通常植物油較好,比較有利健康~~
只要加些新意,就算平淡的食物也變得唔同~~
kammy
我屋企無食橄欖油,因為媽媽話炒餸唔香... 我成日係超市都見到呢個牌子的橄欖油,其實呢兩隻有咩分別呢...如果做蛋糕會邊隻好? 食沙津又係邊一隻好呢?森伯可以教我嗎?
版主回應
係!因為橄欖油本身冇咩味,所以煮食都以清淡為主!!相對用花生油就會香好多!!
我諗你會知的?!想考森伯?!右邊的是初榨橄欖油,用來混沙律又可搽麵包,左邊的橄欖油適合煮餸加熱,可以做麵包蛋糕...
Gael
森兄咁識養生又愛清純野,唔怪得青春常駐年年廿五XXD
版主回應
Gael兄又知森伯愛清純野?!!
年年廿五...講老晒!!我想年年十八~~~~XXXXXXD
搞一爺
鬼鬼喺碟上倒上橄欖油，撒上黑椒同鹽，搣小小麵包，一口一細塊（話係好散文，餐桌禮儀喎！），點椒鹽油來食。
橄欖油係多元不飽和脂肪，可降低壞膽固醇，心臟病係血管俾壞膽固醇搞窄有關
版主回應
一爺兄真係博學，又識餐桌禮儀！又有醫學常識～Good Boy!!!
外國人多享受生活，就算食嘢都慢慢嚟～港人食晏時間，大半個鐘要梗一碗飯…仲邊有閒情一口一細塊慢慢嗒呢!!
ohtria
我多數用佢撈沙律.
Stella
我煑食習慣少油，現在都用橄欖油，兒女長大了！也不煎炸，但出街食就無得選擇了！
版主回應
自從報導講橄欖油健康，好多家庭都會採用～起碼經濟又容易買到！
出街食好難避免，所以我少出街食！
呀博
森兄
香港人住0既地方唔好空氣又差 , 鄰近大陸又大把至乜至物食品入口 , 真被冇可被 .
可幸港人是世界最長壽地區 哈哈
男平均....82
女平均....86
版主回應
現在生活在這個都市裡，很多方面都冇得追求健康的環境，健康的生活！只能在有限的空間裡尋找當中適合自己的生活與飲食～
都市人雖然長壽了，很多人都是帶有慢性的都市病～若然注重下健康，長壽得來又健康，咁唔好咩？？！！
男平均....82～～睇嚟博兄仲有五、六十年後先到啵！！
如心恕也
森兄，講開油，西方除了橄欖油比較多人知道外，原來還有相當多及健康營養價值高的油類，最貴的據我所知會是牛油果油，其次才是橄欖油，另外也有一種叫葡萄子油……而近這十年間，亦有一隻比較多人使用的米糠（rice bran)油，因以上油類都說對心臟好，所以也不便宜。
然而，有一隻並不是初搾的，是翻搾的橄欖油，價錢卻不貴，一加侖若NZ$25～$35之間。
記得若廿年前我已開始吃橄欖油，在百佳買（出產地是西班牙，是百佳自己入樽的產品）當時500毫升也差不多要$50港幣，而且並不是初榨的，現在想起就覺得被搵笨，他們真係食水好深！
版主回應
如心兄：牛油果油好似聽講過，但香港較少地方搵到～只是耐唔耐食牛油果…至於米糠油，一般超市好難搵到，要到有機店先有！！而葡萄籽油因會用化學方法提取，所以都未必是健康油之選～～
通常橄欖油最貴係第一次榨取的油，其後榨價值就會低…
一樣健康食品，新上市的時候一定買得貴！雖然你買了不是初榨的，但可以用來蒸煮餸菜，甚至好似你做的麵包都可以落呢類橄欖油…都唔一定係被搵笨！
當自己常常去百x買嘢就會完全知道佢地食水幾深～～哈哈
herotang
的確好介紹,蔥花炒過會否香d?
版主回應
蔥花你可試下炒,會較好味較易入口...不過蔥生食更有益~~
現在在家吃多數都會走油。
係唔係應該掉轉呢??!!哈哈哈 2014-09-29 10:32:14