或者現今的人就習慣了浪費，最主要浪費後有人執「手尾」，不論衫、袋、連玩具都係！聽長輩講，以前的小朋友（當然係講清末民初期間！哈哈哈）係冇玩具呢樣奢侈品，若要玩就要靠自己的無限創意，身邊有什麼就可以創作出一種玩法來玩！就算乜都冇…都可以一班細路一齊玩，好似麻鷹捉雞仔、猜皇帝、跳飛機、紅綠燈、估領袖…就係要從遊戲中學習嘛！真真正正訓練思考，更可與人溝通接觸～～

時至今日，人大了但間中見到玩具店，都會有衝動想行入去睇睇，其實而家好多大型的玩具店，所出的玩具，有時都唔一定畀細路玩，有些或者都係大人的心頭好！好似車仔模型、機械人模型、卡通偶像的產品…不過我都係睇多過買！！好難搵到森水東西！

後記：有日行經一間小玩具舖，雖然它的玩具貨品唔係繽紛奪目，但見到有啲創意玩具…係木板模型，砌完後仲可以自己上色！更可加個“摩打”木馬同風車就可以旋轉…當個擺設都唔錯架！既可以動動腦筋砌模型之外，仲可以訓練細路對顏色運用等…而且最重要它不是塑膠玩具，是種木渣薄板，就算唔要丟掉都唔會破壞環境！

睇到呢類木板模型，令我諗起細個用雪條棍砌信箱…以前有些日版書籍教人做小手作，一排雪條棍可以砌出好多擺設…小型戰機、傢俬仔、筆筒、甚至屋仔…我當然唔會去到咁高技巧啦！砌完個筆筒唔甩已經偷笑lu！