鹹濕嘢…
上一輩的人，通常有咩搭車搭船，都會買定些少零食上車上船食～我諗是因為怕暈車浪，暈船浪～食返少少甜甜酸酸的涼果，除了可以止嘔之餘更可以在途中提神少少…不過現在的零食有多種選擇，涼果呢類食品，又未必係一個首選！！記得森伯細個時候，路邊都有人擺涼果車，可能已經是咸豐年前，有啲人可能唔記得，有啲人更加可能未見過！我所見的通常擺在巴士站附近，是畀人買完涼果搭車食～涼果車一格格的…感覺有少少似格仔舖 feel～哈哈哈！！通常客人揀什麼就會用個紙袋仔裝起，一般都係十元八塊就有交易！
相信如果要數這些涼果的款式，都有好幾十款之多，不過講到最經典，當然唔少得話梅、加應子、檸檬乾、山楂餅、陳皮（如有遺漏，可提提森伯～～）…有時都好佩服以前的人，小小的涼果，都可以醃製出多款口味！！除了當零食，仲係飲苦茶時必備聖品，若果睇開中醫的朋友都知，執完中藥總會加多一兩包加應子送口…
時至今日，涼果都著重包裝，畀人一種衛生可靠的感覺，但相信點都冇以前車仔檔，辦館買散裝的好食！！
森伯現在都好少再掂呢類涼果，因為大部份都係酸咪咪的，酸的食物是我而家的大忌，所以如非必要都唔會食～有日經過這裡，見到呢檔專賣涼果零食的，唔好見相中好似普普通通，現場幾似座涼果山，望落都幾誇張！只可以見到老闆娘凸個頭仔眼望望，都差唔多有成個人咁高…
涼果之多可想而知…不過有很多新款聽都未聽過，唔知大家又識唔識咩係奶油梅、情人梅、相思梅咁呢？可能只不過係不同嘅話梅咁啦～～
繪畫樂園
為了不想食糖精，我會自己製作涼果，不過就獨孤一味，用煲好既生仔薑，隔去醋汁，風乾或晒乾都可以，咁就成為冬薑喇，又衛生又可口，却風止寒咳止嘔都一流，你亞媽有冇造過喱款野食呀﹖
版主回應
你講開自製涼果，諗起現在都有些風乾機，可以畀自己製下乾果食，用新鮮水果切片風乾，烘乾後就有自製涼果食…唔加任何糖精鹽精之類，食起來健康得多！森媽好少造呢類野食，不過煮其他餸好好，過年時會親手整下糕點，有機會可以講下…
繪畫樂園
涼果款式之多真係數不勝數，望到就癮唔住要買，單以梅為例可以製出十款八款不同口味，奶油梅、相思梅就是喇。涼果也有年代之分，新一代有佛手瓜、八仙果、奇異果、西梅、藍莓、菠蘿、芒果、等等，點止係抵擋暈浪，孕婦也很需要，就算唔食都買番嚟睇吓，止吓作嘔既不適，我都好鐘意食，尤其是頭痛惡心嗰陣，但食完就牙軟兼口乾，我對涼果真係又愛又恨，唔係必要都唔會食，食親喱啲野就表示唔舒服喇。
版主回應
睇相都覺得原來有咁多款涼果，因為有好多都帶酸濕，所以得個睇冇買…你所講的佛手瓜…相信這裡也有見大大舊灰黑黑，好似鎮店之寶咁！！這些涼果若然以傳統方法泡製，取材天然都對某些人士有好處…不過食得多反而口啖啖，總之每樣食物食少少就夠，多吃當然壞肚皮……
BlM
話梅，酸薑我都like. 自少好少食又咸又濕嘢，我只諗起玻璃樽入住一碌碌青瓜同酸果，街邊嘢我最鍾意炒栗子。
版主回應
以前記得有雪糕車，車上都會掛著一包包的酸木瓜之類，可能森媽教誨話呢類酸濕食物唔衛生，所以潛移默化到現在都未食過…
我都係呀，炒栗子是其中一樣喜歡的街頭小食～
herotang
通街都見呢類商店,證明有市場~~
版主回應
不過所有都係獨立包裝，好似沒有了原本風味…
Gael
我鍾意檸汁薑和山渣
版主回應
檸汁薑...好似餸名!!
諗下山渣餅好耐冇食過~~
ohtria
原來係呢d鹹濕o野. 早知唔卜入黎啦. 哈哈.
版主回應
唔好啦王子，你個渴樣出晒黎……畀番少少矜持先得架…… 哈哈哈XXD
搞一爺
以前床頭放好多零食，邊睇片邊食，點食極唔肥，依家就唔得喇！老咗要忍口，真慘。
版主回應
都唔係！零食都可以揀啲健康來食，同樣可以過下口癮，又唔易致肥……
乾果應該唔錯的！
ykk
補充，中式芒果乾涼果是半個，濕及深紅色連核。有別於菲律賓。
版主回應
我冇乜研究…又識多點點！有時見到深紅色，我以為蕃薯乾，有機會要試下是否有分別…
我的名字叫悲傷
我都好鐘意食呢~
版主回應
呢類零食，好多人都鍾意食…
搞掂個新Blog記得通知聲~~而家click去乜都未有……
ykk
ykk細路仔時常食涼果.仲有陳皮梅,黃皮,芒果乾,多樣的薑,蜜餞李,甘草欖,甘草梅等等.
版主回應
係喎~甘草欖,甘草梅,仲有甘草檸檬...都係經典涼果~~不過我好似未食過~~
到而家都覺得芒果乾好正!!!
叾
好想食呀~ 檸檬王好好食架!
版主回應
聽檸檬王個名,都知勁啦!!
以前有種醃製的檸檬,都好好食~~唔知而家仲有冇~~
man-man
有個朋友極之鍾意食話梅，去旅行時見佢時不時都食緊，睇見"牙交"都酸埋。
版主回應
唔知點解有啲人好食得酸的食物,我自問真係唔可以食得太酸....
stella
我都鐘意鹹濕野架！特別係無核話梅呀。諗起都流口水喎！
版主回應
話梅因為甜中帶酸,所以諗起都會流口水...
好多人都喜歡吃呢類鹹酸嘢~~
我很怕吃！XDXD