2013-11-26 10:30:13森源
2013入冬
相信近排的氣溫稍降，很多人都可能會容易唔知醒！！因為一覺醒來都係天黑黑！聽天聞台講，今個禮拜的後期都會幾凍下，試問有邊個會抵擋得住暖暖的被竇…哈哈
差唔多又來到冬天，亦感到一年真的過得快…雖然都已經開始間揭換季了，不過都要搵日真正執執冬天衫～～今早很有趣，有個同搭電梯的人，一進來已經聞到一陣臭丸味，差唔多又係一種──已經被遺忘的氣味！可能近排開始凍，厚厚的冬裝又係出櫳時候，所以衣服還未吹過就要立即著上身了～～不過冬裝與臭丸味，不其然就會諗起小學時候的“薯嘜”校褸，唔係講笑，若然件校褸再加上臭丸味，都可謂薯嘜中的薯嘜！！……以前冇咁多防蟲用品，臭丸樟腦個個都用～不過由細到大，屋企都好少有樟腦臭丸之類，而家更加唔需要啦！好多防蟲片都係無臭無味…
其實在大自然界裡，有好多冷血動物都要冬眠，趁秋天都會儘量令自己食到飽飽，儲定能量捱過嚴冬，跟住就一直睡到暖春……會否令好多人羨慕咁呢，可以食飽就訓！！森伯一凍就會係條大懶蛇，所以有時間都要郁動吓！！
歸家的途中，車輛在傍晚的公路上奔馳，車燈與街燈互相交錯，矇矓中顯得格外有情調，要告知我一天即將過去…日復日，很快一年就過去～～
人越大,感覺時間過得越快
版主回應
認同!!所以自己都要好好利用時間...
2013-11-28 09:46:17
看罷森兄此文, 完全交代ykk心聲. 今天乘電車返公司途中, 鄰座位阿嬋件大褸發出陣陣燶烈臭丸味, 好彩ykk沒有先天性缺乏G6(此症對臭丸有極危險性過敏反應).
版主回應
因為以前的人大多數用臭丸防蟲,冬天厚衫易吸味所以一換季就會有臭丸味...蠶豆症的朋友除左唔聞得臭丸,仲唔可以食蠶豆,一食就會溶血... 2013-11-27 13:56:25
時間過得好快，我又多了些白頭髮...哈哈