就嚟中秋，應吓節都要講下月餅，又唔知大家今個中秋前夕，有冇食左月餅先呢？！其實一般月餅都只不過係餅皮，蓮容，加個鹹蛋黃…但混埋一齊，就變成一樣好好食的應節食品，雖然有些人都會覺得好滯，但至少我會認為好食！！

現代的月餅已經獨立包裝，打開都冇咩味！！反而以前一打開個月餅盒，已經聞到陣陣月餅香……畢竟都咸豐年的事了～～

現在一盒傳統月餅都唔平…閒閒地都要百零二百蚊…其實月餅所用的材料，都唔算得上珍貴～就因為咁！各大小商家都來分杯羮…最反感就係為左賺錢，賣開西餅都要出月餅（美Ｘ、聖安Ｘ等），仲有HaagenＸ賣開雪糕，又做埋雪糕月餅…….擺到明刮大家荷包既錢……你可以話森伯醒目又得，固執都得～從未買過呢類月餅喎！記得以前森爸森媽有句智理明言…常話食月餅等如食蓮蓉包冇咩分別～的確係！茶樓的蓮蓉包頂多十幾蚊一籠，只要將個蓮蓉包塞落個月餅模度，拍出嚟未又係月餅一個，只不過顏色唔同～～

講到冰皮仲搵笨，根本就係雪糕糯米糍的變種，超市價都係十蚊左右，而且仲可以食埋裡面的雪糕添（冰皮月餅加雪糕月餅，雙重口感）…..就因為咁，你就知點解咁多餅商都要爭住做月餅！

有迷你月餅「美譽」之稱的棋子餅，四小個合共……承惠十多元！！

諗諗下呢個中秋，不如買棋子餅、雪米糍…做禮，查實都會慳番唔少～～