利申我有睇哂漫畫及電視劇，但唔係粉，我傾向覺得漫畫結構係太直線及說教。然而整個故事我覺得寫最好嘅段落，一定係猗窩座/狛治嘅舖陳及過去，所以我衝左去睇呢次嘅動畫版。

猗窩座嘅吸引力在於帶動整套漫畫嘅節奏，由殺左杏壽郎去到無限城，都以一個主角無法企及嘅強者姿態出現，同時貫徹弱肉強食嘅理念，嚟斷定人同鬼嘅分野。然而，當最後見到佢嘅過去時，就會發現，佢一直所講要變強嘅信念，連佢自己都講唔出原因，因為原來係建立喺想保護一個已經唔存在，甚至佢自己都忘記咗嘅愛人身上。明明作為罪人，佢已經得到足夠嘅懲罰同寬恕，但因為悲劇，令佢失去記憶，而之後所做嘅一切，都係向着自己嘅心嘅相反方向發展，係超級咁悲哀。 其實會睇得出作者都好偏心猗窩座呢個角色，因為除咗佢之外，其他啲鬼都冇呢種反差咁大，深情及悲傷嘅過去。ok，上弦一嘅故事都複雜嘅，但始終同主線聯繫，少不免多咗種為咗鋪個歷史來由而產生嘅角色咁，嗰種永遠都排第二嘅心情都好慘，但就唔夠猗窩座個故事咁能夠撩動人心。