約左好耐, 終於都去得成澳門了, 雖然比較少人, 但話晒都未去過, 又幾有興緻, 於是我們六人一早就好似小學生去旅行咁係中港城集合。快速地走去買票, 正呀, 套票平50蚊，不過一開船, 有d 唔妥, 咁飄的, 坐左一個鐘, 差點嘔白泡…..

我們第一個站就去澳門旅遊塔, 跟住就去醫肚了, 食完就去大三巴, 但俾路人甲點左去山上的炮台, 遠到阿媽都唔認得, 接著行去大三巴, 發覺有條樓梯可以行上去的, 但原來樓梯上可以望到地下的, 我的畏高症又發作……呢鑊杰了…..好似仲嚴重左….

再去鉅記買杏仁餅, 之後就食最最最出名的豬排包, 又真是幾正喎! 因為表哥誠意推介隔離有間蟹粉撈麵, 我們當然問問老闆娘知唔知啦, 佢話唔知, 我們就好失望咁走了, 小丙, 行行下, 隔離咪大大張Poster 寫住招牌菜蟹皇撈麵囉, 盲的嗎﹖哈哈, 入到去6個人叫左一碗試下味先, 嘩, 超正, 真是不俗, 再叫多碗, 其實一人可以一碗的, 但是實在太飽了~

差唔多5點幾, 就坐車去我們今天的主打— 蒲京挑戰何生，哈, 未去過賭場, 周圍巡, 發覺勁多大陸人. 我們決定玩老虎機….唔洗3分鐘就輸左十幾鋪, 一個銀都無丟過出黎, 唔對路, 鳴金收兵先, 哈
睇左大細好耐, Cedric Pian 終於出手了, 淘大賭聖就仲諗緊盤路, 最後30秒, 決定買大, YES~贏左一舊, 之後又睇左好耐, 再贏多一鋪, 起初仲諗住走, 點知犯左賭錢大忌, 貪~ 輸返一鋪, 都是見好就收了, 最後總算贏返個彩!

今日食左好多野呀, 都不枉此行啦, 不過有個遺憾呢, 就是食唔到葡撻, 因為賣晒了, 返到屋企樓下, 條氣仲有d 唔順, 今日一定要食到葡撻, 於是就去KFC買左兩個返屋企食, 我份人就是咁執著呢…