羅馬書12:9-21這麼說

你係點樣嘅人就點樣去愛，咪扮嘢。
你條命咁正，咪整衰佢，點都要佢好好地。
要深深咁愛你嘅朋友，甘心響佢哋身邊做阿四。
咪搞到自己謝晒；要畀自己入滿油、叉足電。
做個醒目嘅阿四，開開心心等指示。
艱難嘅時候咪走鬼咗去，愈難就愈要祈多啲禱。
記住要幫嗰啲有需要嘅弟兄姊妹，諗多啲橋幫佢哋。
祝福嗰啲你唔妥佢嘅人，咪寸佢鬧佢。
朋友開心你就一齊開心；朋友冧檔就同佢一齊喊。
同人好好相處，咪寸嘴囂張。
同啲清潔阿嬸做朋友，咪咁巴巴閉。
唔好報仇，要睇到人哋好嘅一面。
如果得，就同人好好相處啦。
唔好下下都話唔fair，呢啲唔係你做嘅。
「呢度我話事，」上帝咁話：「我會搞掂佢。」
我哋本聖經話，見到嗰個你唔妥嘅人肚餓，你就買個飯畀佢食；
見到佢口渴，就畀水佢飲。
你咁好人咁大方，佢實畀你嚇親。
唔好畀嗰啲惡事將你本來好好嗰一面整冧；
要堅持做好事，令個情況有幾衰幾壞都仍然有好嘢發生。