我又好耐冇更新過呢度啦，首先要對大家說句對不起！一個網頁唔更新，好自然就冇人會繼續黎。網主我亦深明呢個道理，此道理就是因果關係，有呢個因，就有呢個果，但卻不斷又不斷有人去犯同一個錯誤。以前我站在一個小網友既角色去睇人地既網頁，心裡面不時咒罵一些唔更新網頁既網主，而家回想起都覺得好笑，原來一直咒罵緊既係以前一個無聊小網友=自己囉！不過我又會開始繼續在這裡寫下野了，因為我已放棄左一隻佔據左我很多時間的online game！

講講我自己近來怎樣吧，相信一些最近沒聯絡我既朋友會想知道呢^^！８月中既會考放榜，拿到成績單，望一望result 係１２分＋英文fail，英文不及格是我意想不到的，加上一些阻滯，最後搵唔到學校升中六…當時既感覺就係前路頓然一黑，我跟住應該點做？找工作？我就係唔想咁快再投身社會才考這次試吧！找私校？呢個意料唔到既事情點會令我有準備錢去交學費？最後因為得到親友既協助下，我選擇左後者，因為自己總唔想白費之前難得的努力！

但一個更意想不到的事又再發生，呢間學校既屯門分校已經冇哂位！因為我聽到一ｄ既消息，話因為下年會考的課程會作出比較大既改變，所以好多好多與１４分很接近既考生，都已經唔選擇重讀，紛紛走到一些名氣低落既學校同埋私校去升ｆ６；所以連往年一向無人問律既蔗渣，今年都搖身一變變成身價昂貴既燒鵝！(黃輕貴?)最後此學校話見反應熱烈，九龍灣加開最後一班(最後...--;)，而當時只係８月１９號！咁我就係一個無可選擇既情況下，無奈接受安排，到遙遠既九龍灣返學了。

從小到大都未試過要到一間咁遠既學校返學，小學呢我就讀何日東小學，如果知道我住邊既人一定知道有幾近，只係3分鐘既路程；中學就遠d，呂祥光中學，都只係8分鐘路程，但係我記得自己曾經咁都有過怨言……一向都唔慣既我早起我，而家日日要由新界西坐車到九龍東，都咪話唔野少ga，每日來回都已佔了我接近2小時了！雖然係辛苦左ｄ，但係我既埋怨竟然冇想像中既多喎～連自己都不敢相信！反而擔心既係車費問題，屋企會唔會負擔太重？所以而家日日都慳慳慳，睇黎我真的長大了點！- -

而家與同學相處總算不錯，沒有想像中的太差，不過班中很快就有幾個人走左，使到原本只有２９人的課室更加少人，但氣氛總算不錯啦。不得不提這所學校因為只係補習學校，已經冇咩以前既校園氣氛，連所謂的班主任我都只見過一次，因為佢教既係我冇修既ｅｃｏｎ，所以到目前為止除左老師教得唔錯，同學相處唔錯之外，都冇乜其他特別要提及既地方。

我知道９月時成日打機忽略左個新聞台，忽略左大家，唔好咒罵我呀～我會補返數ga！（謎之聲：聽住先啦!）