─阿母煮的菜─

足久沒返去啊
足久沒吃得阿母煮的菜

厝內電火猶原遐邇暗
阿母佇暗佘佘的灶腳煮飯
土腳溼溼更黏黏，一款酸酸的
味鑽入我的胸崁
曲龜的煎匙攪兮攪兮
一跤一世人摝未清氣的黑鼎

喝一聲
阿母的煎匙越過來
無張遲，我的腹肚互啥物扎著
應一聲
鎖未安的水道頭潺潺滴

吃飽未？愛呷啥物
阿母看著我返來真歡喜
飯桌頂報紙的下腳甘是過時的菜
阿母緊將少年漚佮老的年歲藏入去菜櫥仔內
我假樣無看著──誰人
一嘴一嘴
舀伊的青春飼我的未來

桌頂愈來愈鬧熱，但是我不知欲配啥物
一雙箸惦啾啾那千斤重
菜刀出力剁佇骨頭頂，油煙親像罩茫霧
阿母消失佇灶腳內，更
一聲一聲一塊一塊互我吞落腹肚內

酸筍仔湯的面頂有幾仔隻死狗蟻
猶原佇我的目睭內泅水
一排家蚔從菜櫥仔的碟仔內
將爛瓜仔搬入去我的鼻孔底
阿母！更有啥物貨不是物配
更有啥物貨有這恁好的滋味

隨欲走喔──我不敢廣出嘴
但是阿母已經在替我準備
家己種的苦瓜、木瓜、番藷葉
更有一袋青粼粼的柳丁佮檸檬
月娘懸懸的巷仔頭
阿母陪我行佮底

高速公路無聲無說
落了一陣大雨


作者：river