一直覺得無線o既遊戲節目「亮相」係抄襲台灣o既「我猜我猜我猜猜猜」。唔同o既係，「我猜」請三位朋友自己介紹自己，講到天馬行空都得，仲會向呢三位「謎面」朋友問問題，等參加者推理一下邊個先係真邊個又係假；而「亮相」果十二個謎面，每人最多講得兩句說話，參加者淨係靠睇外表估估下，我做觀眾o既睇參加者個樣多過睇謎面個樣，都唔好睇o既。

　　仲有呀，我地要估謎面o既身份，十二個裏面得一兩個真係比較特別少少，其他果d都好普通，有時仲離譜到個身份係「澳門出生」或者「在某地住了二十年」，咩事呀個監製，佢以為澳門人有三個鼻七隻耳仔呀？

　　計我話呢，無線應該整個特別版，十二位紅男綠女，要配對o既身份係「曾經一腳踏五船」、「曾擁有廿六個前度男／女友」、「十二歲失身」等等，我保證收視一定好勁，同埋一定唔會有嘉賓贏到廿五萬！