Dear 楠,

解答完你o既問題，都等我報告下我做緊d mer。其實都只係返工o者。

我o既兩個同事都幾不滿總編，但係我覺得佢地搞錯左，佢地只係不滿返工o者。成日都話遲放工，無得去街，無得返屋企。我唔知佢地當初做呢份工o既心態係點。我自己就好清楚，我知道呢份係一份相對o黎講人工少，工作時間長o既工，但係條路係我揀，我唔會怨。或者到有一日我頂唔順會放棄都未定，但絕對唔係呢個時候。我仲有好多野唔識，仲有好多野想學。其實我覺得我o個d 同事都係，如果佢要搵份舒服d o既工一定可以搵到。

今日我地做校對。校對o既時間比我想像中o既長，由三點對到九點。每人都要睇份稿一次。呢個係一個好漫長而痛苦o既過程，好多野要對，隻眼會好痛。不過，呢個亦都係編輯必要o既工作，傳遞正確o既訊息畀讀者係我地o既責任，所以我地真係有需要check咁多次。睇到咁上下，我都想求其d，但係我會諗，如果想求其就唔好做呢份工啦！想求其去做份舒服d o既工o米得lor。做mer去搵份低d 人工o既工去求其呀。於是我真係好堅持每一行都睇，咁結果我梗係睇得好慢啦。

至於我o既一位同事，佢睇到後尾已經求其，真係望一望就算。攪到我好似好認真咁。我覺得咁求其不如唔好睇啦，唉~既然知道自己點解要做呢份工，就好應該努力做好佢，咁先係尊重自己o既決定。每一份工都有一舊豬頭骨，份工越有趣，份豬頭骨就越大。我地唔可以淨係淨係要好玩而唔要d 豬頭骨，咁樣你唔係鍾意你份工作，你係鍾意玩o者。

raku pocari