"工廠學院"收生是有準則的，不似得"筷子-扮-大學"的什麼人也收，但和其他院校一樣 -- 有錢不會不要，所以不合標準的同學可以選擇付雙陪學費，入讀所謂"F"班。這些學生是大家認為最難攪的 -- 成績不好，但是正式的"消費者"。我手頭上有三班 - 而且是"低中之低"，因為是Computing的同學。 星期四這班又最為特別。

仍記得第一次上這一班時的錯愕 -- 一進門便發現是全男班，關於"工廠學院"的學生的惡行聽得多 -- 慶幸那天沒有穿裙子。接著聽到的是:

"又轉了老師呀?" (請問，"又"是什麼意思?)
"阿Sir終於都頂唔住我地喇..." (你唔好嚇我喔...")

好了，略略介紹了自己之後就依規定點名，順便認識下他們，看著Register，又想笑又想哭....他們的名子有:

"Super", "King", "Lamlam", "Bee", "Flower", "Dragon", "Darling"...

好似傻婆般點完名之後上課 -- 只有一兩個是聽書的，其餘都是看都市日報、睡覺、傾計、玩。第一次上完堂，打擊好大，又不敢離開我專用的地盤 (即是Teacher’s desk, PC, 和黑板附近)，不知走近他們會有什麼下場。

上多一兩堂，發現呢班人其實只是聽不明英文，而且好動好玩。如是者，我Nicam和"剪紙仔"的生涯就展開了 -- Nicam是要有中有英的上課，"剪紙仔"是因為要做教材玩Games。辛苦，但由無人聽書，到大家有講有笑，值得。

今日他們跟我"吹水" --
同學A: "Miss你有無發現我地唔走你堂架"
我:"又好似係喎，但係你返來瞓呢..."
同學B:"真係累嘛...."
同學C:"我地真係好比面你架，今日得你一堂咋，我地係特登返來上架"
我:"下?真架?點解之前唔調堂呀?" (真係好驚喜喎...)
同學D:"之前同阿Sir提過，佢唔知有無攪過，後尾仲粒聲唔出走左，之後你就來代佢喇。"
同學A: "係呀，我地無同你講，因為開頭以為你唔識中文架..." (唔係嘛....)
同學C: "係呀，大佬你一入來就be li ba la 講英文...."
我: "咁英文堂呀嘛...."
同學B:"不過Miss你好勁呀，你真係無鬧過我地..." (我費事傷身嘛....)
同學E:"係呀，仲讚我叻仔喎..." (我反省了好耐...我幾時講過d咁嘔心的說話? 一定是看得太多丁常旺...)
我:"下個Sem再調啦....不過唔知係唔係我教你地..."
同學B or D or E: "下? 你教啦，你英文流利中文好聽..."
同學A: "人好人靚衫又靚...."

(好想聽多幾句...不過似乎佢地無貨喇....)

同學F: "係呀，又好恰..."

(的確，好日子不會長....)


後記一: 一定要說，他們不是日日都咁可愛的，今日不是"正常"的。

後記二: "有趣的名子"不是這班獨有，有班更"有趣" -- "Creamy", "Juicy", "Fruity", "Beer", "Donkey"，又不敢笑，怕小朋友真的喜歡自己的名子。結果下課後私下跟"Creamy", "Juicy", "Fruity"傾計，我總算是教他們"business writing"，沒理由讓他們出來工作被人笑 -- 大佬，你不是由他們在Resume寫的Email address 是"creamy@hellokitty.com"吧? 她們問為什麼名子不好 -- 我只著她們用自己的名做Google search看看會"彈"些什麼出來....