[鬱捽的夜]

自己一人坐佇亭仔下
捧起酒杯
用著飄撇的姿勢
一嘴互乾
鬱捽的心內
激出著勉強的笑容

三分表情，七分感情
大聲唱出著彼條屬於咱的老歌
一段唱了擱一段
身邊彼蕊委屈的菊花
大概是聽佮霧煞煞

天頂的月娘
不知宓去搭
互阮相來相去揣歸埔
無躊躇
一陣冷枝枝的西風掃過來
煞來起痂荵筍

這個眠真長
一分一秒慢慢仔走
唉!!
眠，雖然是長
為何阮又感嘆
歲月的匆匆佮無情呢

懷念的鄉村
變成一片的田園
過去的老朋友
嘛攏已經士農工商
無緣的阿花仔
無緣的阿花仔
啊!!
甭講也罷

雲，終於散囉
月娘，已經探頭
昔日的一切
不變的只有是天頂的月
也莫怪
當月光照著阮的時
更加添阮
滿身莫名其妙的愁