咱攏知唱台語歌佮唱國語歌，氣口不仝款，聲嗽不仝款，滋味享受，佇咱的心肝頭都有完全不相仝的感覺。用台語、客語唸古詩，會當完全接近古詩原有的聲韻跟滋味，比起北京話好聽幾十倍。台語新詩呢？台語新詩按怎去找著家己的芳味？勿會呼儂看無點；美麗的山水，水氣的言語，不通呼儂當作無聲無說。

    用台語寫詩，真濟前輩已經行在頭前，長青在詩的創作技巧上，早就有《落葉集》的基礎，願意跟隨前輩的腳步，往台語詩這咧方向發展，咱樂觀其成。

    詩，無分古今，攏是語言佮現實的交談、對話；詩，無論是用台語、國語，攏仝款愛用風雨雷電、草木禽獸，創作新的世界。詩的本質勿會變，即點不免懷疑，詩的創意不通放棄，這亦是詩人的責任。長青《江湖》台語詩集佇即方面攏有認分，做到徹底。

    一般人寫台語詩，免不了大聲呼喊，粗腳重蹄，好親像這卡是講台語、寫台文的唯一方式，這卡是台灣人講話的模式；一般咱所看著的台語詩，總是以鄉土題材為限，以本土意識為重，好親像台語詩簡那有一款面貌，簡那會當寫一項題材。即擺長青的《江湖》完全脫離一般人對台語詩的既定印象，消除台語詩就是「本土」、就是「鄉土」的限制，表現出台灣多元文化的特色，為二十一世紀的台語詩行出全新的路向，行出全面正確的未來。

    二十一世紀，台灣人已經坐「高鐵」南北二路咧走，坐飛機歸粒地球踅透透，台語詩的未來，應該有全新的「江湖」氣，至少長青是一個勇敢的台灣人，伊行出佮人不仝的江湖，因為伊瞭解「人在江湖，心事應當遼闊明朗」。