中文名係: 尼蒙利斯連環不幸事件。台灣譯做”波特萊爾的冒險”, 好明顯香港譯名贏左一仗~

根據暢銷兒童小說改篇而成, 不過內容幾黑暗, 唔怪得而家d小朋友個個都咁變態。原著仲未完, 第十三本會係十月十三號先出, 冇錯, 就係黑色星期五! d美國人咁鬼鐘意玩噱頭。

講返套戲, 查實幾好睇。同樣都係兒童文學改篇, 佢冇哈利波特個節奏咁慢, 事實上我覺得好快就睇哂套戲, 起碼中間我冇睇過表。雖然話100分鐘唔係好長, 不過如果套戲唔好睇, 我都已經可以睇左十幾次表。

Jim Carrey做奸角, 仲係好傳統o個d個樣騎呢, 性格陰濕, 品味極差o既奸角。佢就真係冇得頂, 做得非常之咁好。我成日都覺得作為一個演員, Jim Carrey經常得唔到佢應該有o既尊重, 事實上佢真係一個好好o既演員。

孤兒裡面o既家姐(Violet)由Emily Browning飾演。拍攝o個時應該得15歲左右, 個角色十四歲, match到冇人有。加上個樣生得幾靚, 靚得o黎又幾tough, 同Violet個性格幾似。話說原來係導演唔覺意睇電視見到佢, 之後就搵佢casting, 世事真係被人寫好哂。

負責書蟲細佬個角色就係Liam Aiken, 細細個已經同Tom Hanks, Julia Roberts等等巨星合作過, 真係唔講得笑。有樣野好好笑, 就係拍攝初期, 佢係矮過Emily, 但到最後階段已經高過家姐, 成個拍攝過程高左11cm有多, 搞到d戲服改完又改。

牙力驚人o既細妹Sunny就由一對雙胞胎飾演, 佢地成日拍拍下都訓著, 勁得意。不過都好過原先casting o個三胞胎, 一上場就淨係識喊。

除左幾位主角, Meryl Streep做o既驚青阿姨都好抵死。片尾仲有Dustin Hoffman客串做影評人。而貫穿成套戲o既旁白係就由Jude Law聲演o既Lemony Snicket。講下講下, 套戲都真係幾星光燿燿。

成套戲基本上係冇實景, 差唔多所有背景都係電腦造出o黎, 呢個睇怕都係電影o既大趨勢, 如果真係咁, 以後o既戲就真係越來越少”人氣”喇。幸好, 呢套戲d特技都冇刻意賣弄, 尤其最後幾個小朋友返去燒毀左o既大屋o個一幕, 成個場景轉換得好自然。

Special Feature做得幾好, 會令人有心機睇埋佢。另外個menu設計係小數令我覺得唔煩o既設計, 幾好。

HMV: $69