本來應該去訓
但輾轉反側，都係思緒不寧
個心始終好唔舒服
於是起身開番部電腦
將腦海中所想既都打晒出黎



今日又係同細佬整理下個屋企

計落細佬入左冷氣哩行都有三四年
哩幾年佢都學左好多野
屋企水電裝修本來由父親大人主持
而家都變左做細佬既功夫…

是日一早不文人坐爆廁所板
於是要細佬黎換
下晝細佬又去買一大堆工具番屋企
母親大人吩咐要將解碼器電線繞過門框
唔好再係地下阻住晒
又要細佬黎搞
見住佢拎住個鎚仔同釘起勁咁係門框上落釘
加銅馬再箍住條電線
搞左一大輪，成個背脊都係汗水
一滴滴咁流落黎
一句怨言都冇
相反個阿哥，即係不文人
乜都唔識做，只係企係佢身邊得個睇字
哩個就係一個大學生既作用
就係企係度睇人做野…

見到搭棚工人高空工作
又見過工匠既精細手工
知道冷氣工人嚮惡劣環境下搞盡腦汁舖設風喉
佢地既智慧、佢地既專業、佢地既手藝
都係叫人讚嘆不已
仲有好多好多
夠膽守係公廁既清潔工人
日日對住 d 賤人都仲要堆起塊面笑既 sale
係太陽可以晒死人既時候仲赤膊做野既地盤工人
佢地都係親手建設左哩個社會既人
係流住血流住汗咁工作既人
可恨既係佢地冇得到相應既待遇
佢地人工少到連養自己都唔夠
佢地從來冇俾人「真正」尊重過
繁榮社會既榮譽並無加冕於佢地身上
而係嚮所謂既大學生身上

一個淨係識得買牌子野
淨係識得去唱 k 、睇戲、搵好野食、去旅行、嘆冷氣同打機
淨係識得嚮考試前讀兩頁書
但換廁所板都唔識，亦唔會拎鑽同鎚以至做 d 有益於家庭之事既人
佢可以搵萬幾蚊人工
佢可以戴住頂代表榮譽既四方帽周圍炫耀
都仲唔夠咁要戴住佢走去影幾廿張不知廉恥既相~

相反一個唔敢花錢買衫而終留連mk 同鴨寮街買「cheap衫」同「水貨」野
冇去唱 k、睇戲；行街口渴都唔會飲五花茶；冇諗過去旅行；冇得嘆冷氣而只係可以整冷氣，卻又對生活全無奢求同怨言
地盤既大小工程以至屋企既大小工程都要處理
事業建基於全身汗水流個不停既人
佢只可以搵五千蚊人工
佢只可以俾人睇死做冷氣仔
佢既功績冇人會留意，亦冇人得閒去欣賞
佢付出既努力不下於戴住四方帽既人
但佢從來分享唔到半分榮譽，亦冇人認為佢擁有榮譽，亦冇人記得佢擁有榮譽
好心人嚮人地提佢之下，會欣賞哩類人
賤人嚮人地提佢之下，會更加唔認同哩類人

個世界好唔公平
付出所謂既腦力就可以好威
付出勞力就只能向人卑躬屈膝

我從來冇否定四方帽人士所付出既一切
只係唔明白、唔理解
果班只係識得唱 k、打機，娛樂自己
而冇認真付出過既人
佢地點解可以咁趾高氣揚咁戴住四方帽炫耀
佢地點解可以厚顏無耻咁同 d 真正付出努力既人去分享努力學術而換黎既榮耀
而與此同時去以大學生身份睇唔起、歧視嫌棄果 d 「出身卑微」而技能超卓既人呢？

就係因為你好彩入到大學？
就係因為你有錢買到張「金沙紙」？
就係因為你有得上成日走堂既 course？
就係因為你識得寫幾隻字？或者連幾隻字都寫錯，然後再以大學生身份同人講「我寫得岩！」？
就係因為你讀 d 連師奶精打細算都更比你更周密既精算？
就係因為你讀 d 連執紙皮阿婆既生活哲學都可以更高超既柏拉圖思想、李耳思想？
就係因為你讀 d 連魚肉燒賣製造商既高瞻遠觸都比你強既BBA？

每想到不文人細佬
每想到出面果班技工又好、工人又好
佢地都比連廁所板都唔識換既不文人都擁有更多學問
咁不文人憑咩嚮畢業禮戴果頂四方帽呢？
戴上去都只係衣冠沐猴，都只會感到羞愧
如果一個只係識得吃喝玩樂既人可以戴四方帽
咁出面千千萬萬個具才藝既人又要戴咩？

果頂帽絕對唔會為不文人帶黎榮譽
只會係羞恥








我諗不文人嚮畢業禮前

好應該要諗一個理由說服自己
憑咩資格戴果頂死人四方帽…











大學生…