彼段時間，阿爸上重要的代誌就是：起床、食食佮放尿，嘛著愛斟酌伊家己吊的大筒有咧滴無。食物件的時，就算無氣力，猶是會共面紙提咧，隨時共喙角咧欲流落來的喙瀾拭予焦; 足忝想欲睏，嘛百面會共衫仔聊聊仔搝予伸才䖙落來。遮濟幼項的工課，伊攏沓沓仔做，就是想欲延延性命。

雖罔阿爸身軀內底攏是癌細胞，伊猶是講彼是小可代誌，向望現代醫學會當共伊身軀內的三个肉瘤攏總kha̋n-jió。這三个肉瘤，一个佇腰尺，硩著腸仔；一个佇肺部，𤲍著心臟；閣有一个牢佇頷仔頸的大動脈，害伊無法度快活食食。遮的一切，予我看甲不止仔艱苦。

我的阿母，伊共伊的愛參責任濫做伙，無暝無日綿爛咧顧阿爸，有時陣阿母會強迫阿爸食補藥仔，我徛佇後壁，看伊飼甲遐爾仔猌閣厭𤺪，實在忝閣無奈。我常在咧想，咱欲予人關心佮愛的時，若準講無去了解著別人是毋是需要，都強欲予人，按呢是毋是對別人的需要失覺察咧？到尾矣，兩个人攏艱苦罪過爾爾！

佇病院的時陣，我定定感覺會著家己的無力，這毋但是因為我無法度感受著阿爸的苦痛，猶閣有若準阿爸過身，我是欲按怎扞這个家，才會當予伊走會開跤？往早阿母受氣的時，定定會掠狂欲去磕壁，萬不二伊因為阿爸走矣，艱苦甲欲死欲活閣走精去是欲按怎?……想著遮，實在予我足驚惶。

過一站仔，我知影這已經是事實矣，只好向望阿爸身體放予冗莫閣痛，去到另外一个所在做天使。我這个在生的人，著愛學會曉放下，嘛愛了解阿母需要的是啥物款的愛，好好仔參伊鬥陣。