4月29日 (星期日)

今日, 約賤兔12:30pm 係旺角朗豪坊等, 本來都唸緊佢究竟有冇咁早起身o架? 約我咁早出黎? 佢會唔會又遲大到o架? 佢係遲到大王黎o架喎, 遲到一, 兩個鐘濕濕碎, 好似食生菜咁容易o架! 好出奇, 係我等緊巴士果時, 佢就打電話黎, 佢話今早佢好早起身, 仲早過我, 仲話佢就黎出門口, 問我去到邊. 乜話? 仲過我起身? 我9:00am 起身都算早o架啦, 佢邊度會仲得過我起身o架? 真係奇聞!

我差唔多12:30pm 就到o左朗豪坊啦, 點知佢仲未到, 要多十分鐘. 遲到大王真係冇改錯個名, 佢都準備好晒出門o架啦, 到最後都係要遲到, 佢唔遲到係唔得o架喎!

去o左壽司亭食lunch, 黎度原來有lunch set o架喎, 都几抵食. 不過今日係星期日喎, 但係都冇咩人黎o既? 真係有d奇怪!

食完野, 去睇電腦. 佢部notebook仲o左毒, 又唔見o左隻開機碟, 加上部機又舊舊地, 想買過部. 行行下, 去o左一間甜品店食野. 我叫o左碗”椰汁西米露涼粉”, 佢就叫o左碗”雪糕椰汁黑糯米”. 嘩, 黎度d甜品都好好食呀, 唔算貴, 而且亦都几大碗, 好抵食呀!

之後我地去唱K, 不過今次係join埋一大班人, 一共十二個. 原來黎班人個個年齡都比我地大一d o既, 而且個個都實在......太過靚子靚女啦(反話), 我都暈晒浪! 我覺得佢地個個都愛面子喎, 又扮晒野, 懶係有文化, 懶係高貴咁樣. 嘩, 真係頂唔順佢地黎班人, 而且同佢地講野, 真係要小心d講說話. 我同緊住係我右手面個女仔傾偈, 我想問下佢番咩工? 係咪番o左好耐? 嘩~~~ 佢竟然俾我o既回應係問我咩意思先? 咁樣俾佢問一問, 好彩我醒目o者, get到佢句話係咩意思o者. 佢即係想暗示我係咪覺得佢年齡大? 我咪即刻回應佢係咪番o左黎份工好耐, 係咪對份工好熟識. 嘩, 一額汗呀, 好彩即時兜得番o者, 如果唔係後果不勘設想! 佢覺得我地好細個, 好似o岩o岩考完A-Level o既中七學生哥. 嗯, 乜原來我個樣咁細路仔o架咋?

都唱o左K一陣, 7:20pm 我地閃人先啦. 陪賤兔去買埋部notebook, 之後去o左”九龍燒味牛扒餐廳”食dinner. 嗯, 原來黎間荼餐廳d野食都几好味喎, 下次方便o既, 都可以再黎食過. 食飽飽, 都夜lu, 番屋企lu.