其中一套最愛嘅電影。已經睇過起碼廿幾次 <非常突然> , 點知原來今日先係第一次一氣呵成。唔知點解對悲劇收場嘅結局特別有好感 (最討厭無線大團圓結局)。

超可愛嘅三角戀、Ken Sir (任達華) 同阿森 (劉青雲) 嘅默契、Mandy (蒙家慧) 嘅西餐廳、微雨幾乎無停過。
仲有阿森嘅藍色車同橙色皮褸, 好深刻。
<非常突然> 穿插幾段感情, 幾個警察之間嘅事同對話又表現出佢哋嘅友情, 例如監視馬會時, 阿森走咗去煮飯; 又或者槍神 (許紹雄) 同阿森講老婆三胞胎同時二奶生 cancer。比起其他『警察故事』, 的確係多 D 人情味又過癮 D。過癮亦包括配樂, 劉青雲幾次出場都有首鬼馬嘅音樂襯住, 就好似 <槍火> 其中一首都有同樣效果。

最後高潮, 四部車, 六個差人兩個賊, 一條橫街之內嘅喪屍式槍戰 - 我雖然有幸未曾現場目擊, 但深信一擊即殺係唔可能。原本去 happy hour 嘅重案組, 同埋綠色的士上面兩個大陸悍匪, 大家不斷中槍又不斷爭扎, 全部一次過死晒。
亦都覺得埋尾時, 一邊用遠鏡映住 Mandy 喊一邊開始出完場字幕, 幾特別又唔礙眼。

以為導演係杜琪峰, 原來叫做游達志。<暗花> 都係佢嘅, 喺有線望過兩眼並唔討好, 但發覺好多人嘅評價甚高, 決定俾多次機會。



講開便衣警察, 隨便數幾個有比較浮誇嘅劉健明、野獸嘅一眾刑警、大隻佬嘅女人李鳳儀; 比較入格嘅有李 Sir (李修賢 <喋血雙雄> )、黃智誠督察、何 Sir (劉青雲 <暗戰> )。
始終最鐘意前晚睇嘅阿 Pit (梁家輝 <目露兇光> )。

阿 Pit 好似好普通咁, 恤衫唔扣鈕襯西褲, 揸槍亦唔係最型, 但得我歡心係因為此差人非常火爆但唔浮誇, 有極強觀察能力同偵探頭腦; 面對好猛嘅山景酒店, 同正常人一樣會怕鬼又不失專業一條人硬闖; 不修邊幅又唔記得自己生日, 完全忘我。

劉青雲好邪好嚇人, 阿 Pit 上司同郭藹明超水準演出。全片氣氛一流, 最驚要數一塊好地地嘅廁板, 嚇死你。
仲有提一提黎耀祥, 佢依家有一個變態佬嘅形象, 唔知算唔算成功, 但其實轉型之前做一 D 普通配角都唔差。<目露兇光> 嘅阿 Bee , 中文名叫丁根君, 絕對係一個 gag; 呢個好現實嘅便衣, 喺幾估唔到嘅情況下意外中槍, 死咗, 認真非常突然。

好大好大程度上鐘意呢套戲係因為阿 Pit。總結梁家輝: 演技固然好; 風趣不俗, 火爆更絕。 (風趣是指 <錦繡前程>、<江湖告急> 等, 絕非 <絕種鐵金鋼>。求你不要接爛片... )



無人會唔記得『我係油尖區重案組總督察黃啟法』。除咗 <暗戰> , 其實喺 <目露兇光> 同 <非常突然> 入面, 許生都有極度相似嘅角色... 難得係我唔厭喎！佢揹起呢三套戲大部份笑位都唔錯, 比新紮師妹系列都好。






(p.s. 繼續發現有線版本同 VCD 版本有出入; 似乎為咗夾時段, 有線不惜一切經常一刀切, 播嘅係無情 (情) 刪剪版。)