一套喺有線電影台播到爛得不能爛嘅戲, 流落英倫至發現兩點: 其一, 絕對好戲; 其二, 有線版本係刪剪版, 因為今日睇 VCD 版至知原來至尊寶 (周星馳) 下體位置前後總共燒著過 4 次, 而非有線嘅 1 次。

二當家: 切左佢啦, 都燶晒囉。
至尊寶: 香口 D 啫, 好過無嘅。

喺有線睇既時候, 因為差唔多日日都可以睇同埋隨時都可能會睇得到嘅關係, 只為笑位; 到今日睇過無數影評, 同埋無咗有線而珍而重之地再睇, 感覺固然唔同。



一幕講到至尊寶同白晶晶 (莫文蔚) 用計逃走, 之後佢地互換返本身套衫, 呢個時候至尊寶想望吓身後嘅白晶晶時, 發覺對方已經無聲無色飛咗上一個山頭上面沉思。

至尊寶: 如果佢係人你話幾好呢。

原來一個人、一個仙, 套用到今日嘅世界都絕無不可。距離由地區之差, 身分之差再到時空之差。點樣先至係緣份呢? 你嘅另一半又喺 <1984> , 定 <1874> ?
定 <2046> 嘅暑假?



亦有一幕唔提唔得, 就係跟手喺山上面白晶晶因為身中劇毒隨時升仙之餘, 又寂寞又情傷, 所以突然作勢想同好似孫悟空嘅至尊寶就地做愛, 但當二人合力解開至尊寶條褲個死結時, 白晶晶突然推開咗佢。

至尊寶: 我見妳情緒咁高脹所以想話配合吓架咋。雖然我至尊寶並唔係咩正人君子, 但乘人之危既野我一定唔會做！
白晶晶: 我唔慣日抖呀...夜晚先啦...
至尊寶: 日抖又好夜晚又好, 只要妳需要我就會俾妳。由呢一刻開始我會一路陪住妳。

雖則全程兩個人差唔多同著整齊衫無分別, 但幾個 close-up 影住佢地互除對方嘅頭巾呀肚兜呀鞋呀咁, 加上兩個人好襯大自然背景嘅狂野行為, 意淫程度可歌可泣, 絕對直逼好多影迷都覺得經典嘅一幕 - 鐵達尼號入面嘅一架車入面, 兩個喘住氣嘅主角喺玻璃窗上面一手造成嘅蒸氣同埋手印。唔露點無呻吟聲都能夠帶出最大效果, 應該算最高境界。



部戲好, 多得有豬八戒前世二當家嘅吳孟達, 同埋白晶晶師姐蜘蛛精嘅藍潔瑛。佢哋兩個比星爺更超水準演出, 尤其二當家全心去愛蜘蛛精, 終於最後一刻喺盤絲洞外面博得蜘蛛精一句『相公！』, 非常感動。當然, 戲是劉鎮偉的, 好好笑。不得不提菩提老祖扮葡提子食葡提子; 扮大聖爺隻手俾火燒一幕嘅幽默好高好高。

至尊寶: 燶喇。
(菩提老祖無奈苦笑, 繼續燒)


(至尊寶毒發, 以手代足想走時, 失手)
二當家: 啊！幫主跌左落屎坑呀！大家快 D 痾屎！



(至尊寶想困住蜘蛛精, 點知白晶晶突然屍變, 佢唯有入埋去密室; 二人相對, 著住白晶晶衫嘅至尊寶苦笑)
至尊寶: 冤冤相報何時了呢?



(至尊寶趕住出去做第 4 次波依波囉咪時, 先衝去打二當家一身然後轉身走)
二當家: 唔講咪唔講囉, 做咩要打鑊我呢?



(二當家睇住至尊寶第 4 次波依波囉咪)
二當家: 娘子, 同牛魔王出黎睇耶穌呀。