落難倫敦其中一樣消遣就係睇中文 net news 。星期五我坐o係電腦前面, 又見到你喇楊永強。

絕對係令我好震撼好震撼既一則新聞, 真係好得人驚。大字標題『楊永強說總有些人要犧牲』, 我真係有以口形做左個『嘩』然後用手掩口, 開頭我以為係話今時今日既流感, 睇落先知係講返好多個月之前o既沙士。

成單新聞應該大家都知道大概: 有個民望經已好低, 叫楊局長既友仔, 就被踢爆曾經o係沙士高峰期研究應否剖鼠查毒以及疏散陶居民時開過金口, 話『為顧全大局, 總會有些人要犧牲感歎號』

姑勿論係句號定感歎號, 咪話我話, 靜係呢句都夠殺。加上我覺得佢話『有些人』更加俾到我一種『你條碌咀係有計劃地誤殺』既感覺。好地地咪有人要死囉, 咩叫有 d 人要死先？



但其實睇完呢篇好震撼到我既新聞之後, 我並無聯想到『倒楊』呀, 『楊毀』呀果 d 示威心情, 反而係我自己。真係好唔明, 當刻既第一個想法, 就係覺得其實阿局長既手段, 同由我一手負責既分手似乎沒有兩樣: 都係一個人決定, 都係唔理對方感受, 同埋都係為左所謂既『顧全大局』。

我諗我作為一個身在倫敦既小市民所能感受到呢篇新聞帶黎既震撼, 遠遠遠遠唔及今日竟然未香、當日既淘大居民。



可以試下自己入廁所對住塊鏡, 同佢講『我話分手句號』, 然後一分鐘恢復情緒之後再講『梗會有人要犧牲架啦感歎號』, 可能前者更令你心寒。

我話可能o者。