都好耐無聽過電台，尋晚無意之中聽到呢首「細路哥」。
突然之間覺得，訓教個時應該會有好多野諗，唔知點解呢？
之後今日上網搵返0黎聽，覺得越聽越有意思。
所以將佢ｐｏｓｔ咗係呢度，因為......我鐘意囉～
如果咁啱比你睇到，希望睇緊既你都會鐘意啦。

＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝＝

林海峰-細路哥 II

某一年一班剛剛考完會考嘅同學約埋一齊唱K
流行曲唱到一半嘅時候
其中一位朋友問咗隔離嗰位一個問題
喂　你估二十年後嘅今日我地會變成一個咩人呢

二十年後
可能已經變成一個西裝骨骨嘅中環人
手戴勞力士　銀包有好多張信用卡
放工嘅時候就一齊喺酒吧度
一邊望住個煙灰盅　一邊望住隔離檯嗰個女仔
睇吓佢條裙幾時會走光

二十年後
大概終於會買咗個部好想擁有既汽車
但係仲有二十幾期要供
二十年嘞　應該轉過好多份工
識做嘅野越嚟越多
但係同時發覺學識越嚟越少

喺嗰個時間　間唔中可能會去吓gym
但係做嚟做去都係減唔到個肚腩
當然二十年嚟你間唔中都會諗起一段
一路都未能放低嘅感情
女朋友越嚟越多　但係愛嘅越嚟越少

細路哥　你得到什麼　你失去什麼
你知道　what are u looking for

大概喺嗰個時候可能會有身邊嘅親人離開
而喺個陣時你會有好多講唔出口嘅遺憾
同時間你會發覺原來人生已經過咗一大半

同年終於結婚嘞
用左半生嘅積蓄俾左一層樓嘅首期
有車位有泳池會所
娛樂越嚟越多但係快樂越嚟越少

兩年後　可能會離婚
回復單身之後嘅一個晚上一個人喺床上面
揸住搖控不停咁轉台　食咗兩粒安眠藥
跟住點起支薄荷煙
然後流咗一滴自親人離世之後嘅眼淚

突然之間你又諗起　喺二十年前
你係一個咩人　係個一晚
一大班同學約埋出嚟一齊唱K　唱到天光
仲記得係個朝返到屋企嘅時候
打開門喺檯面見到有一碗屋企人留低嘅湯
碗湯已經凍咗嘞

細路哥　你得到什麼　你失去什麼
你知道　what are u looking for

********************************************