今日訓到成１０點先起身，１０點半就ＣＨＥＣＫＯＵＴ，放底哂Ｄ行李之後就出發今日最後之旅！

ＰＳ：原來第一日太趕去造幣局，連酒店門口都未影相

我地首先去松屋食個超豐富既早餐先　～～　其實我地第一年食過呢間屋之後，亞浩愛上左佢　～～　哈哈！！自此之後，我地連續呢兩年都有食！

今日既ＰＬＡＮＮＩＮＧ就係冇ＰＬＡＮＮＩＮＧ，想去邊就去邊．．．第一站係我想去既ＭＵＪＩ，其實都冇咩想買，只係睇書見到個袋可以自己吸字仔印上去，好想整番個！哈哈　～～

完來都行幾遠架喎．．．去到ＭＵＪＩ真係同香港冇分別．．．我地快速行完落番地下整個袋，Ｄ字仔印好鬼淺色，用好大力吸上去都好似唔食色咁．．．我仲整左２個　～～　諗住一個送俾人　～～

之後完去左電電城，好明顯俾本書昆左黎，唔岩我地行，點解我俾本書昆左，係因為佢話有大量既扭蛋機，中招．．．

我地有努力咁行哂架，好無聊．．．

之後我地又番左去黑門市場喇　～～　今日既主要目的係買士多啤梨番香港，所以臨走前都黎走番轉，首先買左４盒用左１５００ＹＥＮ，自以為好抵既同時，行行下去番我地果日買果間鋪，做緊７００ＹＥＮ４盒，有冇攪錯．．．仲大粒既添！！哼哼哼　～～　我梗係再買多４盒啦！！！

之後大家都仲未見餓，就周圍行下街市同超市啦　～～　見到好多好靚既牛肉呀　～～　真係好想買番黎，我仲同亞浩講，反正今晚番到黎屋企應該餓，不過依家買盒牛肉今晚番屋企打邊爐　～～　＞Ｗ＜　

我梗係俾人鬧痴線啦　～～

我地今日ＬＡＳＴ呢餐決定去本書介紹既咖喱烏冬，個伯伯真係一碗碗去煮架　～～　個味道仲唔錯添！！其實睇落去好似好簡單咁　～～　我有機會要試下先得　～～　哈哈　！！

買完又食完之後，番酒店樓下ＨＥＡ一陣　～～　我仲買左個蝦餅夾墨丸添　～～　我就覺得一般喇．．．

其實大阪既墨丸點解我覺得唔好食係因為佢中間太多好似未熟既漿．．．我上年係東京食果個真係好好味架！！就算連香港都唔差呀　～～　

食完之後我地番酒店等上車，其間有對香港男女一齊拎行李，個女仔突然問我既士多啤梨邊道買，佢都想買，我答佢黑門市場，但周圍都冇得買，趕唔切買．．．佢就好失望咁話個男既點解唔去．．．

等左大概３個字左右，酒店人員叫我地上車喇　～～　但好笑之處，架巴士唔係停係酒店門口，而係後Ｄ既馬路邊，兩旁都係車走黎走去架．．．好驚險！

上左車之後，我梗係開始訓啦　～～　我今日行左冇耐條腰就痛喇，行行下又同亞浩講，我想搵野坐底．．．死未．．．未老先衰．．．

大概訓一個鐘到就到機場喇，真係唔捨得　～～　咁快就過左５日．．．

拎完行李之後，ＣＸ條隊好鬼長，梗係掉底行李先去拎我訂左既士多啤大福啦，排左大概半個鐘到就到我地喇　～～　我地今次寄左把唔值錢既遮　～～　好攪笑　～～

我地攪掂Ｄ行李之後，落番去２樓拎我既野　～～　呵！！真係好鬼受歡迎，去親都唔見佢有貨，我拎完我盒野之後，就行一行２樓同３樓，其間又見到
ＵＮＩＱＬＯ，諗住睇下見唔見我買唔到果條ＴＥＥ啦　～～　見到一件咁多，決定放棄！哼　～～

ＰＳ：大家去關西機場，記得上２樓既青木松風庵買士多啤大福呀，不過佢都係做期間限定　～～　睇大家彩數喇　～～

好順利入左閘之後，我見到哈根大司，梗係朝拜一下啦　～～　我食左個白桃味，日本先有架　～～　我覺得味道一般．．．

食完之後就坐無人駕駛去入閘位喇　～～　ＯＳＡＫＡ　ＢＹＥＢＹＥ喇　～

我地今次既位置係３／４／３，但係個位闊好多！（落機先發覺，呢架機係改裝過定新機黎架　～～）我隔離係一個好ＮＩＣＥ既鬼婆，因為有人係隔離我地唔想出出入入　～～　話哂都唔方便呀嘛！！

仲記得我上機果陣睇果套”魔幻輪盤”無啦啦睇唔到個尾，呢架機竟然有，仲可以飛黎睇呀　～～　開心到爆！起碼俾我睇埋個尾先呀嘛　～～

睇完之後就有餐食喇　～～　今次我地食既係魚　～～　都ＯＫ喎！起碼好過豬先啦　～～　我差唔多食哂．．．

大概９點我地就落機喇　～～　話咁快番左黎香港，但係拎行李可唔可以快Ｄ呀．．．我出閘既時候，個肚突然間有Ｄ痛，我去廁所叫亞浩拎住先，點知我攪掂出番黎，佢答我”部機仲未嘔行李出黎呀．．．”！之後足足等左大概半粒鐘我地先拎到，之後就坐Ａ２２回家去　～～