今日一收工亞浩話佢要出灣仔送貨，正諗住自己番屋企等佢！點知突然間佢話佢租左車，上黎接埋我出去灣仔！咁．．．我就咁樣跟左佢出左去！之後食左個晏，我地又坐番荃灣小巴番荃灣轉巴士入屯門！

咁樣兜黎兜去都唔駛４點半，真好　～～　之後就帶仔仔坐的士去拆線！去到個姑娘個樣超串，點知講野仲衰！我俾張咭佢登記，佢好惡咁叫我等陣囉！之後有２個姑娘出黎（就係上次講到唔清唔楚果個），之後佢地就拎哂剪出黎，原來拆線唔駛見醫生，係姑娘拆架！仲要衰到一個捉一個拆！好在我亞仔乖，不過佢乖一陣之後，就開始反抗喇！之後換左第２個熟手既姑娘出黎！剪哂之後我就俾姑娘鬧啦！話我好唔俾佢帶喇叭俾佢可以ｌａｍ自己個傷口，佢依家有少少發炎喇！你一定要忍心架！如果唔係個傷口爆開咪搵黎攪囉！

我聽完都真係覺得好嬲！我忍！之後買左支佢話ｏｋ既消毒藥水！之後就同亞浩坐番的士番屋企喇！

講左我嬲既野，佢跟本就唔明點解我唔俾佢帶喇叭，你估我想佢死咩！我已經第一日試左６個鐘好忍心咁用喇叭架喇！佢真係唔旭呀嘛！因為佢由細到大佢都冇俾野綁過，除左去街啦！佢都係見到佢條去街繩先肯綁咋！例如我地俾衫佢著，佢係好似俾人點左穴咁，可以全日唔旭架！

好　～～　你話我咁樣都叫唔忍心，我認！佢第一日已經賴左幾次尿呀！咪就係因為個喇叭囉！咁我可以點呀？！水佢又唔行去飲，野佢又唔行去食，總之佢帶係邊個位開始帶佢個喇叭，佢就定左佢帶果個位喇！佢唔沖得十日涼呀大佬！佢果日仲成身都係尿架！好燥　～～　睇黎要去飲涼茶先得喇！