夜晚番到香港見早，又醒起亞媽今日唔駛番工，我就同婉薇番去我屋企附近一齊食飯喇！不過打亞媽手提唔通，咁我問細佬係咪o係屋企啦，細佬又話唔o係，咁我唯有叫佢見到亞媽就打俾我喇！

過左冇幾耐，亞媽打黎問我搵佢做乜，我聽佢既口吻，已經覺得怪怪，仲講講下突然同我講話”我好嬲呀，我唔食喇！”，收線後我就同婉薇講番同一番說話，我地對望之後大笑，成車人望住我地，哈哈！咁當然番到屋企睇下發生咩事先啦，但係我已經急不及待打去俾我細佬問下發生咩事，原來只係佢今日去左我老豆道染髮，但係做 high light 既色唔出，又收佢 300幾蚊 (包焗油)，佢就覺得唔底喇，同埋佢覺得老豆同佢識左咁耐，都知佢 d 頭髮唔易上色喎，仲同佢咁整佢就覺得好嬲喇，我真係覺得超無聊，為左咁樣就嬲一餐，咁咪好唔得閑！

番到去同佢食飯，佢仲黑口黑面，咁我梗係睇下佢個頭有乜唔妥啦，但係真係冇囉，只係好明顯見到佢係染左髮，但係就冇做 high light 咁囉！因為佢個頭本身係金色，依家個頭好明顯係紅囉，但係紅真係好難睇到 high light 架嘛！佢同我地食完飯之後就出左去，我同細佬都感覺到，今晚好大鑊，唔會有覺好訓！