三十行動網

2013-08-21 16:34:34三十行動

世界級奇趣城市

留言 0 收藏 0 推薦 0

文／高岸峰

　　澳門呢個地方真係好搞鬼，千奇百趣嘅事日日發生。所以旅遊局宣傳口號係：「澳門就是與別不同」。回歸十年嘅的主題曲叫：「一個神奇的地方」。有幾與別不同？有幾神奇？等我帶大家睇下。

　　一、澳門嘅行政法務司陳司長一做就係十幾年……政績就無啦，衰野就一大堆，喺公務員群體內更係人見人憎。墓地門事件以權謀私，全城鬧爆！你以為佢會落台？咪傻啦！雖然證據確鑿，但佢學謝檸檬出一招「頂包」，搵人食死貓，咩事都無～仲鬧？告你影響特別政府嘅形象架！咁都得？由中央政府委任嘅高官有咩唔得呀？

　　千奇百趣，澳門嘅神奇高官好賴皮～～

　　二、放工翻屋企睇電視，咦？有雪花嘅？唔通個電視機壞左？唔係喎，好多人屋企都睇唔到。咩事呢？原來電信局為左處理有線同公天問題，俾千幾萬有線，最後連免費嘅澳視體育同澳視高清都無得睇。有無搞錯！政府俾錢開嘅電視台澳門人都睇唔到？唔通盂蘭節近，開嚟俾先人睇嘅？局長話想睇可以自己裝魚骨天線，真係回到過去，魚骨萬歲！雖然呢兩個台喺群眾劇烈反對下有機會復播，但政府呢啲叫聽取民意，定欺善怕惡呢？

　　千奇百趣，澳門嘅官台變雪花～～

　　三、今年係澳門立法會選舉年，精打細算嘅家庭主婦就最開心啦！點解？等我哋訪問下「哥師奶」你就知：「我最鐘意就係選舉年，屋企慳好多架。好似選之前兩個月開始就有大大小小嘅飯局，晚飯都唔洗煮。超市現金券、優惠券、家鄉禮品包一大堆，好過政府現金分享。日常用品好似杯、遮、筆、扇全部唔洗買，仲有十幾個款任我揀。選舉宣傳嗰陣，仲有人朝朝派餅俾我個仔食，早餐錢都唔駛俾，真係希望年年搞選舉。怕唔怕賄選俾人捉？未驚過！個個都係咁架啦！」

　　千奇百趣，澳門嘅選舉慳家用大法～～