今日係三月十一日,係一個好重要o既日子..今日可能會係我o係協和最後一日上課..
今朝一大早起咗身,比平日早好多出門口,返到去見到C班成班人o係門口唔知做乜...問咗王華之後先知原來佢地想等齊人一齊入去排隊..上到課室入面都冇乜人,不過走廊就好多人喇..好多人影相..我都影咗d~
跟住集隊唔講,冇乜特別..今日頭兩堂都係eng,做paper 3,不過隔離班勁嘈,o係度唱歌,搞到我集中唔到..有d唔想做o既感覺..做到咁上下走咗去廁所,出到去先知原來勁多人出哂黎玩,d人o係恤衫上面簽哂名,我都幫人畫咗幾隻龜..
小息o既時候即刻走落去換衫,今日中文堂唔洗上,玩咗三堂,又打籃球又踢波~咁都冇乜特別,之後lunch直落先有野玩,攞咗件班衫比人簽名,簽咗好多,仲同好多人影咗好多相..D班係咁o係度播歌,佢地d人可能聽得太耐,搞到忍唔住,喊得好淒涼..仲見到李嘉睿自己一個吹口琴..lunch之後last一堂amaths,健sir派番d勁耐之前o既野,我攞番f.3果陣電腦科份project....又同健sir影咗d相..
本來last兩堂係chem堂,但係miss she借咗,不過都比我地玩埋,走埋過隔離班影相,搵齊好多好兄弟影相,第時唔知仲有冇機會成日見...
終於到咗最重要o既時刻喇~放學了~我地落咗playground影相,排咗個5Eo既陣同d呀sir,miss講多謝~最後仲搵埋以前1E班同學影相,睇到都覺得好笑,同以前果張比較一下,我地每一個人都長大咗好多..
晚上約齊哂全班加埋d老師一齊去食韓燒,大家都玩得好高興~
時間真係過得好快...咁就五年~諗番o係協和o既五個年頭,雖然係一團糟,但係都算滿意啦~老套d講句,五年前發生o既事,真係好似尋日發生一様...今日想以最樂觀o既心態去面對,不過最後都係忍唔住...
o係協和入面咁多人,我好想多謝一個人,佢就係chester喇~佢當年做實習老師,第一班學生就我地1E..識咗佢五年喇,當咗佢係好朋友,雖然我唔係一個好學生,但係佢依然對我好好,o係ICQ同佢傾計佢一定會對我講好多鼓勵o既說話,從來冇話我唔得,今日上去搵佢影相,令我諗起好多事,搞到我...出年唔知仲會唔會好似而家咁成日見到佢...好唔捨得
過埋今日,聽朝又係一個新開始,正式進入作戰狀態,會考,唔係幻想就夠,要有實際行動,會考勁過!!