墾丁已經予世界國家公園組織除名囉

這款見笑代誌無人咧關心

做為台灣第一座的國家公園

佇全球暖化的這咧時陣

咱的政府對著自然生態保育的態度予咱目水流

墾丁有豐富的熱帶植物佮珊瑚礁

這種珍貴的天然資源照講是應該受著保護的

無人會當借著任何名義來改變

尤其是執政的人更加著愛疼惜

袂當放外外

事實煞毋是按呢

咱的墾丁有一座核能電廠，不斷排放高溫水

有無合法的水上電動車，佇海面喔喔嚷

有全球國家公園內頭一擺看著的夜市仔

有全球國家公園內上多的飯店、旅館

有乎農委會列做「家畜」的野生梅花鹿
佇岸邊擱有滿滿是的魚網仔

未來擱有莫名其妙的台電南部展示館

這款浮浪狂的管理

造成墾丁面對一項擱一項的生態危機 
因為過度的開發

只要落雨著會將沙仔帶入大海汙染水質

予墾丁的珊瑚不斷白化、不斷死亡

亦擱有彼當年想欲經營做紙的民間企業

對中南美洲引進銀合歡這種樹根有毒性的樹種

大量種佇恆春半島，這種樹仔生足緊

嚴重危害原生熱帶植物
留予墾丁的生態無限的危機

擱有真多真多代誌予咱傷心

墾丁的貝殼逗逗仔消失

墾丁的風飛沙袂擱有沙

佳樂水地區只袸滿地破碎的蜂窩岩

 ....................

敢講你無看著咱的土地予人咧糟蹋

敢講你無聽著墾丁的哭聲

有一工，總會有彼工

咱會聽著咱家己咧哞哞哮