藝人談善言、楊偲泳（Renci）、歐錦棠、韋家雄、麥方喬（前名為麥家琪）等，現身藍田一間中學為電影《喜歡妳是妳》舉行開鏡儀式，主角談善言及Renci更齊齊以「學生妹」造型亮相，大晒青春氣息！

着校服冇違和感

二人一同受訪，談善言笑話雖然離開中學十年，但重新穿上校服都冇違和感：「好多人讚我似中學生，我都唔知幾開心，今次係飾演中六學生，Renci係轉校過嚟嘅高材生，我係班長，會有一段撲朔迷離嘅感情，講我哋女仔成長，呢件事係我哋生命嘅插曲。」Renci續指二人於戲內相遇對大家都非常重要，問到可曾於讀書時間有密友？談善言就話密友通常是女生，但未曾生過情愫：「今次係喺女校發生，就可能有啲迷思。」

早已相識冇尷尬

Renci大爆戲內無論言語、情感、身體接觸上都會有超越閨蜜的階段性舉動，問到可會有床戲？她就笑笑口賣關子，只表示會有親密戲：「未拍嘅，因為依家劇本仲改緊，實行飛紙仔方式。」她們大方指屆時不會尷尬，因為早已相識兼同床過：「拍完呢套戲更加熟，會一齊食飯、飲酒、瞓覺、敷Mask。」談善言表示反而跟女生拍親吻戲更不尷尬：「會在意同男仔有身體上面嘅接觸，或者會擔心另外一半，但同女仔就冇呢個顧慮，會肆無忌憚。」她又大爆私下有好多男性朋友知道她同Renci有親密戲，都羨慕不已。