雖然世界普遍對同性戀嘅觀感日漸開放，但職業運動界，特別係足球界仲係禁忌，好似英格蘭仲未有現役職業球員正式出櫃；英甲查爾頓就創先河，以職業球會名義組織一支同志球隊，希望可以加強球迷對同志球員嘅接受程度。
英國業餘同志球隊其實都唔少，好似倫敦就有支叫Bexley Invicta，查爾頓就以呢支業餘兵做基礎，唔單止係原本男同志隊員，仲用廣招女同志、以及雙性戀、跨性別人士等性小眾，不過參與咩比賽仲未知。身為球員兼領隊嘅加利堅拿就話：「以往同志踢波好慘，面對冇球場，冇對手嘅情況，希望查爾頓今次作出第一步，可以令球壇改變呢個歧見。」加利堅拿亦預期，會有更多球會，甚至英超球會組織呢類同志隊。