歌手王若琪（Takki）早前拍攝微電影，主題是出售不愉快的回憶：「拍完之後我諗咗好耐，如果有人曾經對我唔好，我會唔會賣走啲記憶？其實唔會，因為咁先會令自己做一個更好嘅人，畀人Hurt過就自然唔好Hurt人咁多。雖然依家唔想記住，但都因為嗰啲人令我進步同更好。」提到憑微電影奪得女主角金獎，她坦言沒想到以中性打扮贏得獎項：「係今年一個喜訊。（想拍多啲戲？）梗係好啦，我鍾意演戲，可以做到現實做唔到嘅嘢。」她認為能夠演繹另一人很有趣，笑言可透過角色發洩想罵人的情緒：「我跟過老師學做舞台劇，好耐之前同周國賢、劉浩龍做過。舞台劇要放到好大，試過唔見咗道具花，又試過有演員甩咗鞋底，呢啲就係Live嘅好玩。」

問到中性打扮可會吸引同性追求？Takki說：「呢個問題10年前已經好多人問，身邊好多朋友係呢啲關係，冇問題，愛就係愛，男又好，女又好，我都唔會個個都鍾意，唔係有人追就𦧲飯應。」她自言是宅女，不太喜歡出街，因此最近沒認識新朋友：「我好鍾意夜晚喺屋企開支紅酒睇戲，有時就叫朋友上嚟玩。」