歌手王若琪（Takki）事隔兩年推出新歌《世人笑我太瘋癲》，她表示自己以前很多非情歌，亦有很多感覺黑暗的歌曲，而新歌就於不開心之中有點倔強及自信，代表她的愛情觀：「對於愛情，我唔理你係點，總之我要做自己鍾意嘅嘢，我愛就得。以前就好多死人冧樓嘅歌，但呢幾年經歷多咗，每經歷一樣嘢都要上一課，上天畀考驗你，係要你學到正面嘅嘢，而唔係淨係同人講媽咪有病、自己事業唔好，所以我嘅歌有改變。」




她透露稍後會推出開心、輕快及型格的歌曲，現在的形象亦與之前不同：「以前留長頭髮，身邊不斷有人話短頭髮襯我多啲，問我點解要咁，都有人話我長頭髮幾靚。我覺得以前唔係唔靚，不過唔係我自己，好似人哋套落我度，今年做番自己，身邊朋友都話好順眼，歌迷都應該幾受落。」




Takki坦言喜歡中性形象，自小就不喜歡穿校裙：「校裙係一年着一次，就係影班相嘅時候，我亦都帶領成班小學女同學唔着校裙，全部日日着PE衫，唔知點解唔會畀人罰，男同學一見我着裙就會笑我，不過中學就唔得啦。」現在她不介意穿裙，認為中性形象也可以穿，但自言性格男仔頭：「中性打扮比較適合我。（難啲搵男朋友？）呢樣嘢唔關事架嘛？係咪有啲男仔鍾意呢樣嘢？」她認為愛不用刻意尋找，總會遇到一個在身邊。