【母親節專版】
【本報訊】孝順子女今日和母親慶祝，但一些孩子早逝的母親，卻百般滋味在心頭。兒子腦幹死亡、願意盡捐孩子七種器官的母親，今天回味的，是孩子生前為她煮番茄炒蛋的味道；同志戀人堅持生育下一代，今日擁抱孖仔甜到漏；沒母親照顧的小女孩，也得到寄養姨姨的「母愛」；而自閉兒的母親，最希望政府辦好融合教育；孝順天經地義，有時，也是創業商機。
記者：梁德倫　陳凱迎　倪清江　潘柏林　呂麗嬋

女同志：孖仔是神的恩賜

不足三歲的Christoffer和Shepherd是孖生兄弟，來自不一樣的家庭──他們有一對同性戀媽媽。兩兄弟雖只有「媽咪」和「媽媽」，但兩位同是基督徒的母親Sovannary和Shek說，兩名兒子是神的賜予，這個不一樣的四口之家依然幸福。
兩歲九個月大的Christoffer和 Shepherd，是Sovannary於美國透過科技生殖所生，兩個兒子的名字都有特別意思。Shek說，一般同性戀者除透過科技是不可能有下一代，即使用了也不一定成功，「所以我哋都覺得可以懷孕係神嘅安排，Shepherd係牧羊人，即係教義內教導真理嘅人；Christoffer可以拆做 Christ Offer，即使神賜畀我哋嘅小朋友」。Sovannary和Shek多年前在華爾街一家銀行工作，其後正式交往。Shek從小到大一直想有小朋友，「我同佢拍拖第二日已經講明一定要有小朋友，佢都認同之後先繼續一齊落去」。她們不諱言決定接受人工受孕前，身邊最好的朋友也勸阻，「但我哋如果當初真係揀咗一個路人嘅指引，𠵱家一定好後悔，因為只要真係好想有一個家庭，即使係LGBT都可以嘅」。為她們進行人工受孕的醫生，也是一名同性戀者，並有下一代，為她們帶來鼓舞。

「家庭組成可以多元化」

Sovannary表示，家人一直反對她的同性戀傾向和懷孕，直至她有產後抑鬱症，父母開始關心她們的情況，加上Shek的父母態度一直開放，雙方家長溝通後逐漸接受，「𠵱家我哋帶埋兩個小朋友去家庭聚會、食飯，大家都已經冇所謂」。
Shek說，她們在孖仔幾個月大時，舉家回流香港，因家人都在這裏，希望小朋友可與長輩有更多接觸。她早已預期在香港會遇到更多歧視問題，「所以我畀佢哋讀對同性戀者係友善嘅國際學校，學校係好清楚我哋嘅家庭背景」。外國早已有兒童書籍講解家庭的組成可以多元化，「唔同種族、男同性戀、女同性戀都可以組成家庭」。
這兩個不一樣的母親，坦言兒子的出世影響很大，「每日做完嘢返到屋企，見到佢哋就會好開心，佢哋係上天賜畀我哋最珍貴、最特別嘅禮物」。

盡捐兒器官惠及20病人

一道番茄炒蛋，是阿May兒子生前慶祝母親節時煮得最好的一道菜，酸中帶甜，也是思憶滋味。一場交通意外，阿May兒子頭部重創腦幹死亡，她和家人決定盡捐兒子心、肝、腎及眼角膜等器官，惠及20名病人。阿May說：「至少佢（兒子）嘅心跳冇停過，佢雙眼亦睇緊呢個世界。」
06年一個下午，時任保母車司機的阿May，放工後接小女兒回家，望向對街馬路，發現街坊聚集，她走近一看，駭然發現當時14歲的兒子被車撞倒昏迷，「最初唔知原來咁嚴重，佢表面冇乜傷痕」。阿May憶述七年前這經歷時，語氣雖平靜，卻已眼泛淚光。

「可能係上天畀佢嘅責任」

原來兒子頭部被撞致腦出血，送院後立即開腦施手術，術後頭部腫脹，躺在病床身上插滿儀器，「我第一句就問醫生：『佢痛唔痛苦？』我最緊要係佢唔辛苦」。留醫翌日，醫生進行兩次測試，證實兒子腦幹死亡。經院方解釋後，阿May與家人決定盡捐兒子有用器官，家人逐一與他吻別。
負責向阿May解釋的威爾斯親王醫院器官移植聯絡主任唐婉芬說，當日阿May一家的表現，不只感動了她，連鄰近病人的家屬看到，也願意放手捐出逝世親人的器官。阿May兒子生前為跆拳道黑帶，身高約六呎，身體健康，他的心、肝、肺、兩邊腎、一對眼角膜、皮膚和長骨，均適合移植。「呢個可能係上天畀佢嘅責任，遇上交通意外佢嘅器官都仲咁完好，可以幫到其他人。」阿May說。
熱心助人是阿May母親傳下來的家訓，「要幫人就要做啲直接幫到人嘅嘢，唔會淨係捐錢」，捐出兒子器官也出自一份想幫人的心意，叫她最安慰的是在喪禮上看見兒子捐出器官後，遺體外觀並無不同。失去愛兒的阿May傷心欲絕，一度求助心理醫生，「住唔返原來間屋」。她最難忘兩個孩子為慶祝母親節曾親自下廚，兒子離開後，妹妹填補了哥哥的空缺，阿May也將思念放在內心深處，「希望用生命影響生命，鼓勵更多人捐器官幫人」。
唐婉芬說，自96年至今只有三宗能盡捐七種器官的個案，家屬最不願捐出死者心臟，「佢哋覺得留住個心，死者會永遠記得自己」。