我響台大上的士,個的士司司機狂話趕唔切,企圖遊說我用NT1000(通常要1200咁話喎)坐佢架車直達機場,我簡直又發自己脾氣,又發個司機脾氣,用廣東話叫佢收聲.

後來又俾佢點,超不爽!

然後HMI又話'唔夠時間啦'--真係'盟'(第二聲)到唔知死多細胞.不過好彩,趕得切.不過行李超重,要俾千一.仲因為太遲,無晒位,去坐商務客位--你下次試下,幾爽O架!

不過我著起龍袍唔似太子,去坐商務客位唔似有乜商務要辦--成艙都係叔叔,如果無睇漏眼,應該只有兩個姐姐.無論衣著還是旅行袋,都黑黑實實,個個都物似主人型;我都唔輸蝕,著件鮮黃色衫,揹個鮮橙色包包.

個飛機餐仲精彩--不贅述了,不過,我想講多句,套餐具中無奶精,因為如果你要奶茶,個空姐會幫你落埋.

我好似大鄉里出城,不過,我老是想起那套'大和撫子'.

我2月18號返台灣時坐機尾,薯話,機尾安全D,黑盒都係放機尾O架.

離開時坐機頭(坐機頭的是機司才對,也不對,人都坐在飛機內,機頭根本唔係用係坐o既,亦都唔會有人坐,不過算啦).我的問題是,為什麼商務艙會放得咁前?係唔因為機尾嘈?但係機頭危險喎?
咁即係話,商務艙係高消費,高享受而且高風險?而我就係低消費(其實都唔係好低,相對而言咁啦),高享受而且高風險?!咁講法,都係經濟艙好--低消費,低享受,低風險.但其實,無論風險高低,有意外的話,大家還不是眾望所歸,無得留低?!

跋:非常廣東話.因為我覺得用廣東話才夠傳神.

2002/3/7